Stori newyddion

Ysgrifennydd Cymru yn nodi buddsoddiad Aston Martin mewn gweithgynhyrchu cerbydau heb allyriadau yn safle Sain Tathan

Aston Martin yn buddsoddi £50 miliwn yn ei gyfleuster newydd yn Sain Tathan yng Nghymru

picture of Aston Martin Car in front of jets at Aston Martin

picture of Aston Martin Car in front of jets at Aston Martin

Mae Alun Cairns, Ysgrifennydd Cymru wedi croesawu’r cyhoeddiad heddiw y bydd Aston Martin yn buddsoddi £50 miliwn yn ychwanegol yn ei gyfleuster newydd yn Sain Tathan, Cymru. Dyma fydd ei ganolfan ar gyfer trydaneiddio a chartref y brand, Lagonda. Bydd y buddsoddiad yn creu 200 o swyddi ychwanegol ar y safle. Bydd y ffatri newydd yn denu hyd at 750 o swyddi tra medrus i dde Cymru.

Daw’r cyhoeddiad hwn ar y diwrnod y mae’r Prif Weinidog yn amlinellu ‘cenhadaeth uchelgeisiol’ Llywodraeth y DU i sicrhau bod y DU ar flaen y gad o ran dylunio a gweithgynhyrchu cerbydau heb allyriadau. Bydd yn amlinellu hyn yn ystod ei hanerchiad yn Uwchgynhadledd gyntaf erioed y wlad ar Gerbydau Heb Allyriadau, a gynhelir yn Birmingham.

Wrth nodi cyhoeddiad Aston Martin heddiw, dywedodd Alun Cairns, Ysgrifennydd Gwladol Cymru:

Mae’r cyhoeddiad hwn yn hwb mawr i’r rheini sy’n gweithio yng nghyfleuster gweithgynhyrchu newydd, o’r radd flaenaf Aston Martin yn Sain Tathan. Rwy’n falch y bydd sgiliau a thalentau gweithlu o Gymru yn darparu’r cynnyrch o safon uchel y mae’r brand blaenllaw hwn o Brydain yn adnabyddus amdano ledled y byd.

Cenhadaeth Llywodraeth y DU ydy sicrhau bod y wlad ar flaen y gad o ran dylunio a gweithgynhyrchu cerbydau heb allyriadau. Mae’r ffaith fod cwmni sy’n uchel ei barch ar draws y byd, yn dewis Cymru fel y ganolfan ragoriaeth ar gyfer ei raglen trydaneiddio yn dyst i’r hyn sydd gan ein gwlad i’w gynnig i’r sector modurol. Rwy’n edrych ymlaen at weld y cynlluniau arloesol yn cael eu gwireddu yn ystod y misoedd a’r blynyddoedd nesaf.

Cyhoeddwyd ar 11 September 2018