Annog Awdurdodau Lleol Cymru i fachu cyfran o’r gronfa £6 miliwn i ariannu datrysiadau ynni arloesol
Annog Awdurdodau Lleol Cymru i gyflwyno cynigion arloesol i ddatblygu a chyflwyno cynlluniau ar gyfer rhwydweithiau gwres newydd.
Welsh Local Authorities urged to bring forward innovative proposals to develop and deliver plans for new heat networks.
Mae Gweinidog Swyddfa Cymru, Stephen Crabb AS, yn galw ar Awdurdodau Lleol Cymru i fanteisio i’r eithaf ar raglen grant newydd, werth £6 miliwn, i ddatblygu cynlluniau ar gyfer rhwydweithiau gwresogi ac oeri newydd.
Mae’r rhaglen yn cael ei lansio gan y Gweinidog Ynni a Newid yn yr Hinsawdd, Greg Barker, heddiw a gofynnir i awdurdodau lleol yng Nghymru a Lloegr gyflwyno cynigion uchelgeisiol ac arloesol i ddatblygu a chyflenwi rhwydweithiau gwresogi sy’n defnyddio ynni o ffynonellau adnewyddadwy, cynaliadwy neu adferadwy.
Gallai hyn gynnwys unrhyw system lle mae gwres yn cael ei gynhyrchu oddi ar y safle gan ffynonellau adnewyddadwy neu adferol megis gwres gwastraff o ddiwydiant, ynni o orsafoedd gwastraff a gwres a phŵer cyfun biomas. Mae sawl campws prifysgol, datblygiadau masnachol a phreswyl cymysg newydd a fflatiau uchel yn defnyddio’r systemau hyn i gynhyrchu gwres.
Dywed Gweinidog Swyddfa Cymru, Stephen Crabb, AS:
Mae’n rhaid harneisio i’r eithaf yr holl adnoddau sydd gennym at ein defnydd, a gwneud hyn yn rhan anhepgor o’n diogelwch ynni i’r dyfodol, wrth i ni anelu at leihau ein dibyniaeth ar y ffynonellau ynni mwy traddodiadol.
Mae angen i ni asesu yn gyson sut rydyn ni’n defnyddio ynni, sut rydyn ni’n meddwl am ynni ac o ble y cawn ein hynni. O’r herwydd, byddwn yn annog pob awdurdod lleol yng Nghymru i fanteisio ar y cyfle hwn i ddatblygu rhwydweithiau carbon isel sy’n fwy masnachol hyfyw.
Dim ond trwy wneud hyn y gallwn fynd yr ail filltir honno i helpu Cymru i hawlio ei lle ar flaen y trawsnewid i economi carbon isel.
Mae’r broses bidio i wneud cais am gyllid grant yn dechrau heddiw (20 Medi 2013), a bydd yn parhau am 18 mis drwy gyfres o chwe rownd bidio.
Nodiadau i Olygyddion:
*I gael mwy o wybodaeth am y gronfa, cysylltwch â swyddfa’r wasg yr Adran Ynni a Newid yn yr Hinsawdd ar 0300 068 5570 neu ymwelwch â https://www.gov.uk/government/policies/increasing-the-use-of-low-carbon-technologies/supporting-pages/heat-networks
*Rheolir y gronfa gan yr Uned Cyflenwi Rhwydweithiau Gwres yn yr Adran Ynni a Newid yn yr Hinsawdd. Datblygwyd yr Uned i helpu Awdurdodau Lleol yng Nghymru a Lloegr i gyflawni dadgarboneiddio trefol, twf lleol, gwell effeithlonrwydd ynni a llai o dlodi tanwydd drwy gynyddu’r defnydd o rwydweithiau gwres.
*Asesir y bidiau yn erbyn meini prawf tryloyw a chadarn. Mae’r rhain yn cynnwys eu potensial ar gyfer datblygu masnachol, cyfraniad tuag at amcanion carbon isel a lleihau ynni, cydnawsedd ag agendau carbon isel a thwf ehangach (lle bo hynny’n berthnasol) ac ymrwymiad amlwg i reolaeth a llywodraeth gadarn dros y prosiect.
Diweddarwyd ddiwethaf ar 20 September 2013 + show all updates
-
Added translation
-
Added translation
-
First published.