Ysgrifennydd Cymru: Llywodraeth y DU yn cyhoeddi hwb i apêl Cofeb Fflandrys drwy Gymorth Rhodd
Heddiw, cyhoeddodd David Jones, Ysgrifennydd Gwladol Cymru, y bydd pob rhodd i’r Ymgyrch i gael Cofeb i’r Cymry fu farw yn Fflandrys yn gymwys ar gyfer Cymorth Rhodd.
Flanders War Memorial Appeal
Hyd yn hyn, mae’r apêl gyhoeddus wedi codi £40,000 ar gyfer y gofeb i’r Cymry a wasanaethodd yng Ngwlad Belg yn ystod y Rhyfel Byd Cyntaf. Mae ymgyrchwyr yn apelio am £50,000 yn ychwanegol i helpu i dalu am ddraig goch efydd i fynd ar ben y gofeb.
Mae awdurdod taleithiol Gorllewin Fflandrys wedi cytuno i greu a chynnal gardd goffa Gymreig o amgylch y gofeb.
Heddiw, cadarnhaodd Mr Jones y bydd yr holl roddion i gronfa’r ymgyrch ers sefydlu’r elusen ym mis Mawrth eleni, yn ogystal ag unrhyw roddion yn y dyfodol, yn cael hwb o 25% drwy Gymorth Rhodd, a hynny heb gost ychwanegol i’r rhoddwr.
Dywedodd David Jones, Ysgrifennydd Gwladol Cymru:
Cafodd y Rhyfel Byd Cyntaf effaith sylweddol ar hanes. Mae’n gwbl briodol ein bod yn sicrhau ein bod yn cofio ac yn coffau aberth y Cymry yn ystod y gwrthdaro hwnnw.
Felly rwy’n falch o gyhoeddi y bydd yr holl roddion a dderbyniwyd o’r dyddiad y sefydlwyd yr elusen, a phob rhodd yn y dyfodol, yn gymwys am Gymorth Rhodd. Nawr bydd modd i’r elusen hawlio 25 ceiniog yn ychwanegol am bob punt a roddir. Bydd hyn yn gwneud gwahaniaeth sylweddol i’r swm a roddwyd yn barod, ac i lwyddiant yr apêl y mae Llywodraeth y DU wedi ymrwymo i’w chefnogi, yn y dyfodol.
Byddwn yn annog pawb y mae aberth y dynion a’r merched dewr o Gymru wedi cyffwrdd â’u calonnau, i gyfrannu at yr apêl hon er mwyn sicrhau yr anrhydeddir eu hymdrechion arwrol a sicrhau na fyddwn yn anghofio amdanynt byth.
Mae nifer o gysylltiadau Cymreig â’r gofeb newydd yn Fflandrys.
Fe’i lleolir ychydig fetrau’n unig o’r man ble bu farw’r bardd Hedd Wyn ar 31 Gorffennaf 1917 – diwrnod cyntaf Brwydr Passchendaele, a diwrnod pan enillodd tri o’i gymrodyr Groes Victoria.
Dywedodd yr Uwchgapten Merfyn Thomas (sydd wedi ymddeol), aelod o Bwyllgor Gogledd Cymru ar gyfer yr Ymgyrch i gael Cofeb i’r Cymry fu farw yn Fflandrys:
Bydd cael statws Cymorth Rhodd i’n cronfa yn golygu cynnydd sylweddol mewn refeniw ar gyfer y gofeb gwerth chweil hon i’r dynion a’r merched a wasanaethodd yn Fflandrys yn ystod y Rhyfel Byd Cyntaf, a bydd yn help mawr i ni gyrraedd ein nod o £90,000.
NODIADAU I OLYGYDDION
*Mae Cymorth Rhodd yn ffordd i elusennau gynyddu gwerth rhodd o arian gan drethdalwyr y DU drwy hawlio’r gyfradd dreth sylfaenol a dalodd y rhoddwr ar y rhodd. Gall gynyddu gwerth rhodd o chwarter a hynny heb gost ychwanegol i’r rhoddwr.
*Caiff penderfyniadau ynghylch statws Cymorth Rhodd eu gwneud yn annibynnol gan Gyllid a Thollau Ei Mawrhydi.
*Os ydych chi’n talu treth yn y DU, gallwch gynyddu gwerth eich rhoddion i elusennau drwy ddewis rhoi drwy ‘Gymorth Rhodd’. Gall elusennau hawlio 25 ceiniog ychwanegol am bob punt a roddir.
*I gael rhagor o wybodaeth, cysylltwch â Thîm Cyfathrebu Swyddfa Cymru ar 020 7270 0565
Delwedd drwy garedigrwydd Dave Hamster ar Flickr.
Diweddarwyd ddiwethaf ar 26 September 2013 + show all updates
-
Added translation
-
First published.