Camau gweithredu Llywodraeth y DU i hybu pwerdy Gogledd Cymru
Alun Cairns: Mae gan Lywodraeth Cymru gynllun economaidd ar gyfer Gogledd Cymru ac rydyn ni'n benderfynol o greu'r amodau cywir ar gyfer twf.
Alun Cairns MP visiting Wrexham Prison site
Heddiw (30 Ionawr 2015), cynhaliodd Gweinidog Swyddfa Cymru, Alun Cairns uwchgynhadledd ar drafnidiaeth gydag arweinyddion busnes yng Ngogledd Cymru i drafod manteisio i’r eithaf ar y cyfleoedd ar gyfer twf economaidd yn yr ardal. Roedd y digwyddiad yn blatfform i fusnesau, y diwydiant trafnidiaeth a’r llywodraeth drafod y seilwaith sy’n ofynnol yng Ngogledd Cymru a pharatoi cynllun ar y cyd i atgyfnerthu’r achos dros drydaneiddio’r rheilffordd.
Cyhoeddodd Ysgrifennydd Gwladol Cymru, Stephen Crabb ym mis Tachwedd y byddai’n pledio’r achos dros drydaneiddio rheilffordd Gogledd Cymru i gydweithwyr sydd wrth wraidd y Llywodraeth ac roedd yr uwchgynhadledd heddiw yn helpu i ystyried yn union beth fyddai ei angen i gyflawni hynny.
Cynhaliwyd yr uwchgynhadledd ar drafnidiaeth wythnosau yn unig cyn adroddiad gan Dasglu Trydaneiddio Gogledd Lloegr ar drydaneiddio’r rheilffordd yn Lloegr a thrafododd y cynadleddwyr yr achos dros gael rhwydwaith rheilffyrdd a oedd yn cysylltu â dinasoedd yn Lloegr er mwyn hybu economi Gogledd Cymru.
Dywedodd Alun Cairns:
Mae gan Lywodraeth Cymru gynllun economaidd ar gyfer Gogledd Cymru ac rydyn ni’n benderfynol o greu’r amodau cywir ar gyfer twf. Rydw i am gysylltu Gogledd Cymru â’r dinasoedd yn Lloegr er mwyn i ni allu masnachu, tyfu, denu buddsoddiad preifat a denu’r bobl orau i’r ardal.
Arweinyddion busnes yng Ngogledd Cymru sy’n gyrru’r adferiad economaidd yng Nghymru, a nhw yw’r bobl sy’n gwneud Gogledd Cymru yn Bwerdy Gogleddol i ni. Mae angen i ni weithio gyda’n gilydd i greu twf economaidd, swyddi a chyfleoedd i bobl sy’n gweithio’n galed yng Nghymru.
Trafododd y cynadleddwyr hefyd y cysylltiadau ffyrdd yng Ngogledd Cymru, yn arbennig y llwybrau trawsffiniol a bydd Alun Cairns yn rhannu argymhellion y trafodaethau â chydweithwyr yn yr Adran Drafnidiaeth. Cwmpaswyd manteision Halton Curve a HS2 hefyd i Ogledd Cymru.
Yn ddiweddarach y diwrnod hwnnw aeth Alun Cairns i ymweld â safle Carchar Wrecsam i weld sut mae gwaith yn mynd rhagddo ac i gynnal Symposiwm Cyflogaeth a Sgiliau ym Mhrifysgol Glyndŵr, Wrecsam o 12 o’r gloch ymlaen. Daeth awdurdodau lleol, darparwyr gwaith ac addysg o bob cwr o Ogledd Cymru a’r siroedd cyfagos yn Lloegr ynghyd yn y digwyddiad i drafod sut i gyflawni’r ymrwymiadau ynghylch prentisiaethau, lleoliadau gwaith a chyflogaeth leol mewn modd cydlynol a hygyrch. Amlygodd Mr Cairns y manteision i’r economi leol ac ymdrechion Llywodraeth y DU i gynnal swyddi lleol yn y cadwyni cyflenwi.
Dywedodd Alun Cairns:
Mae Carchar Wrecsam yn gyfle gwych i greu swyddi a thwf yng Ngogledd Cymru. Aeth 280 o fusnesau a oedd yn gysylltiedig ag adeiladu i’n digwyddiad caffael y llynedd ac mae £1.1 filiwn eisoes wedi cael ei neilltuo i fusnesau lleol – sy’n uwch o lawer na’r targed a ddisgwyliwyd ar gam mor gynnar.
Gyda mwy na 75 y cant o’r rheini a gyflogir ar y safle yn dod o’r ardal leol, mae economi Gogledd Cymru eisoes yn elwa ac rydw i’n hyderus, drwy ein cynlluniau uchelgeisiol, y bydd yn parhau i wneud hynny dros y misoedd a’r blynyddoedd nesaf.