Busnesau bwyd bach a micro yn dangos ymrwymiad cryf i ddiogelwch bwyd
Yn ôl ymchwil newydd, a gyhoeddwyd gan yr Asiantaeth Safonau Bwyd (ASB) heddiw, mae busnesau bwyd bach a micro ledled Cymru, Lloegr a Gogledd Iwerddon yn dangos ymrwymiad cryf i ddiogelwch bwyd, er gwaetha’r pwysau economaidd parhaus sy’n wynebu’r sector.
Mae cylch diweddaraf yr Arolwg Tracio Gweithredwyr Busnesau Bwyd Bach a Micro, a gyhoeddwyd heddiw, yn dangos bod ymddiriedaeth yng nghenhadaeth graidd yr ASB yn parhau i fod yn uchel.
-
Ymhlith y rheiny a oedd wedi clywed am yr ASB, dywedodd naw ym mhob deg busnes bwyd bach a micro eu bod nhw’n ymddiried yn yr asiantaeth i gynnal a gwella safonau diogelwch bwyd.
-
Dywedodd bron pob busnes bach a micro sy’n gwerthu prydau bwyd neu fwyd tecawê eu bod nhw’n darparu gwybodaeth am alergenau i gwsmeriaid.
Arferion diogelwch bwyd a gwybodaeth am alergenau
Mae’r adroddiad yn dweud stori gadarnhaol am y sector. Teimlai’r rhan fwyaf o fusnesau bwyd bach a micro fod ganddyn nhw ddigon o wybodaeth am y rheoliadau a oedd yn effeithio arnyn nhw (88%). Dywedodd bron pob un eu bod nhw’n hyderus bod rheoliadau diogelwch bwyd yn effeithiol wrth ddiogelu’r cyhoedd (96%) a bod y rheoliadau hyn yn rhesymol ac yn ymarferol (88%).
Mae nifer y busnesau sy’n darparu gwybodaeth am alergenau yn dal i fod yn uchel hefyd – mae 98% o fusnesau sy’n gwerthu prydau bwyd neu fwyd tecawê, neu sy’n pecynnu bwyd yn syth ar ôl ei werthu, yn dweud eu bod nhw’n darparu gwybodaeth am alergenau i gwsmeriaid. Roedd dwy ran o dair (66%) wedi defnyddio adnoddau’r ASB ar gyfer bwyd heb ei becynnu ymlaen llaw, ac roedd bron i hanner yn defnyddio poster alergenau.
Ymddiriedaeth yng nghenhadaeth graidd yr ASB
Dywedodd naw ym mhob deg busnes (91%) eu bod nhw’n ymddiried yn yr ASB i weithio’n galed i sicrhau bod rheoliadau a diogelwch bwyd yn cael eu cynnal a’u gwella. Yn ogystal, dywedodd 85% fod yr ASB yn dda am nodi lle mae safonau gwael yn bodoli a chymryd camau priodol. Mae’r ddau ffigur yn parhau i fod ymhell uwchlaw’r meincnodau nodweddiadol ar gyfer ymddiriedaeth yn y sector cyhoeddus.
Er bod y ffigurau hyn yn dal i fod yn uchel, maen nhw wedi gostwng o 94% a 90%, yn y drefn honno, ers yr arolwg tracio blaenorol.
Hefyd, gostyngodd cyfran y busnesau a oedd wedi dweud eu bod nhw’n gwybod “llawer” am yr ASB o 32% i 24%, a gostyngodd ymddiriedaeth yn y ffordd y mae’r ASB yn defnyddio gwybodaeth a ddarperir gan fusnesau o 94% i 87%. Bydd yr ASB nawr yn edrych ar wella ei hymgysylltiad a’i chyfathrebu â busnesau bach a micro.
Pwysau ar fusnesau bwyd o hyd
Mae’r arolwg hefyd yn tynnu sylw at yr amgylchiadau heriol y mae llawer o fusnesau bwyd llai o faint yn gweithredu odanyn nhw. Dywedodd dwy ran o dair (67%) fod newid i arferion cwsmeriaid yn gysylltiedig â’r sefyllfa costau byw yn bryder, ac er bod chwyddiant, costau ynni a gwaith recriwtio yn dal i bwyso’n drwm arnyn nhw, mae hyn wedi lleihau ychydig o’i gymharu â 2023.
Dywedodd yr Athro Rick Mumford, Dirprwy Gyfarwyddwr Gwyddoniaeth ac Ymchwil yr ASB:
Mae’r pumed cylch o’n hymchwil tracio yn dangos bod busnesau bwyd bach a micro ledled Cymru, Lloegr a Gogledd Iwerddon yn dal i ymrwymo’n gryf i ddiogelwch bwyd a bod ymddiriedaeth yng nghenhadaeth sylfaenol yr ASB yn uchel.
Mae busnesau’n hyfforddi eu staff, yn rheoli alergenau’n dda, ac yn ymgysylltu â’n canllawiau gan wynebu heriau sylweddol a phwysau economaidd ar yr un pryd.
Rydyn ni’n cymryd y dirywiad a welwn yn ôl rhai mesurau hyder o ddifrif ac yn ei weld yn arwydd clir ar gyfer ble mae angen inni ganolbwyntio ein gwaith cyfathrebu ac ymgysylltu. Dyma’n union pam rydyn ni’n cynnal ymchwil tracio hirdymor.