Datganiad i'r wasg

Dyddiad cau ar gyfer Ffurflenni Treth Hunanasesiad: llai na mis ar ôl

Mae angen i fwy na 5.5 miliwn o drethdalwyr lenwi eu Ffurflenni Treth ar gyfer blwyddyn dreth 2017 i 2018 cyn y dyddiad cau, sef 31 Ionawr 2019.

• Gan: Cyllid a Thollau EF
• Cyhoeddwyd: 2 January 2019
• Diweddarwyd ddiwethaf: 3 January 2019 — Gweld pob diweddariad

Self Assessment promotional image - 'Don't let your tax return peck away at you - do it by 31 January'/ Delwedd hyrwyddo Hunanasesiad - ‘Peidiwch â gadael i’ch Ffurflen Dreth eich pigo - cyflwynwch hi erbyn 31 Ionawr’.

Mae gan tua 5,542,000 o drethdalwyr lai na mis i lenwi eu Ffurflenni Treth Hunanasesiad cyn y dyddiad cau, sef 31 Ionawr 2019.

At ei gilydd, mae dros 11.5 miliwn o Ffurflenni Treth ar gyfer 2017 i 2018 i’w cyflwyno. Mae Cyllid a Thollau EM (CThEM) yn disgwyl y bydd y mwyafrif helaeth o drethdalwyr yn llenwi eu Ffurflenni Treth, ac yn talu unrhyw dreth sydd arnynt, erbyn diwedd y mis.

Ar 31 Rhagfyr 2018, roedd tua 52% o drethdalwyr eisoes wedi cyflwyno eu Ffurflenni Treth, ac roedd dros 5 miliwn o’r rheiny wedi llenwi eu Ffurflenni Treth ar-lein (88% o’r holl Ffurflenni Treth sydd wedi’u cyflwyno).

Os oes angen i chi lenwi Ffurflen Dreth Hunanasesiad, gweler ein harweiniad ar-lein.

Meddai’r Ysgrifennydd Ariannol i’r Trysorlys, Mel Stride:

Mae’n galonogol bod tua 52% o drethdalwyr eisoes wedi llenwi eu Ffurflenni Treth Hunanasesiad. Gyda llai na mis ar ôl tan y dyddiad cau, mae yna dal i fod llawer o bobl y mae angen iddynt weithredu ar unwaith.

Mae CThEM yn annog pawb sy’n cyflwyno Ffurflenni Treth Hunanasesiad i lenwi’r rheiny erbyn 31 Ionawr, ac mae’n cynnig cymorth bob cam o’r ffordd.

Meddai Angela MacDonald, Cyfarwyddwr Cyffredinol CThEM ar gyfer Gwasanaethau i Gwsmeriaid:

Bydd y dyddiad cau ar gyfer cyflwyno Ffurflenni Treth Hunanasesiad, sef 31 Ionawr, yma cyn pen dim. Er hynny, mae dal i fod amser gan gwsmeriaid i gyflwyno eu Ffurflenni Treth ar-lein, a hynny mewn pryd er mwyn osgoi cosbau diangen.

Os ydych yn llenwi Ffurflen Dreth Hunanasesiad am y tro cyntaf, neu os nad ydych wedi dechrau ar eich Ffurflen Dreth ar gyfer 2017 i 2018 hyd yn hyn, mae yna ystod eang o gymorth ac arweiniad ar gael ar GOV.UK i helpu ar bob cam o’r broses.

Mae help i’w gael hefyd ar wefan GOV.UK, neu gan Wasanaeth Cwsmeriaid Cymraeg CThEM ar 0300 200 1900 ac ar y cyfryngau cymdeithasol.

Mae’n rhaid i unigolyn lenwi Ffurflen Dreth os yw unrhyw un o’r canlynol yn wir:

• enillodd fwy na £2,500 drwy roi eiddo ar osod
• cafodd ef neu ei bartner Fudd-dal Plant, ac roedd gan y naill neu’r llall incwm blynyddol o fwy na £50,000
• cafodd fwy na £2,500 o incwm arall heb ei drethu, er enghraifft o ganlyniad i gildyrnau neu gomisiwn
• mae’n unig fasnachwr hunangyflogedig
• mae’n gyflogai sy’n hawlio mwy na £2,500 o dreuliau
• mae ganddo incwm blynyddol dros £100,000
• enillodd incwm o dramor y mae angen iddo dalu treth arno

Os llenwodd cwsmeriaid Ffurflen Dreth Hunanasesiad y llynedd ond nid oedd ganddynt dreth i’w thalu, mae dal yn rhaid iddynt lenwi Ffurflen Dreth ar gyfer 2017 i 2018, oni bai bod CThEM wedi ysgrifennu atynt i roi gwybod nad oes angen gwneud hynny.

Rhagor o wybodaeth

Ffeithiau ynghylch Hunanasesiad:

• 11,564,363 miliwn - cyfanswm y Ffurflenni Treth Hunanasesiad sydd i’w cyflwyno
• 6,022,579 miliwn - nifer y Ffurflenni Treth sydd wedi dod i law erbyn 31 Rhagfyr 2018
• 5,541,784 miliwn - nifer y Ffurflenni Treth sydd heb eu cyflwyno erbyn 31 Rhagfyr 2018
• 5,318,636 miliwn - nifer y Ffurflenni Treth sydd wedi’u cyflwyno ar-lein (88% o gyfanswm y rhai sydd wedi’u cyflwyno) erbyn 31 Rhagfyr 2018
• 703,943 - nifer y Ffurflenni Treth sydd wedi’u cyflwyno ar bapur (12% o gyfanswm y rhai sydd wedi’u cyflwyno) erbyn 31 Rhagfyr 2018

Y cosbau ar gyfer Ffurflenni Treth hwyr:

• cosb benodol gychwynnol o £100, sy’n gymwys hyd yn oed os nad oes treth i’w thalu, neu os yw’r dreth sy’n ddyledus yn cael ei thalu mewn pryd
• ar ôl 3 mis, cosbau ychwanegol o £10 y dydd, hyd at uchafswm o £900
• ar ôl 6 mis, cosb bellach sef 5% o’r dreth sy’n ddyledus neu £300, p’un bynnag o’r rhain sydd fwyaf
• ar ôl 12 mis, cosb arall sef 5% neu £300, p’un bynnag o’r rhain sydd fwyaf

Mae yna gosbau ychwanegol am dalu’n hwyr hefyd sef 5% o’r dreth sydd heb ei thalu ar ôl 30 diwrnod, 6 mis a 12 mis.

Mae treth yn cael ei didynnu’n awtomatig o gyflogau, pensiynau neu gynilion y rhan fwyaf o drethdalwyr yn y DU. Ond, mae’n rhaid i Ffurflen Dreth Hunanasesiad gael ei llenwi bob blwyddyn gan bobl neu fusnesau sydd ddim yn cael treth wedi’i didynnu’n awtomatig, neu sydd o bosibl wedi ennill incwm ychwanegol heb ei drethu.

Cyhoeddwyd ar 2 January 2019
Diweddarwyd ddiwethaf ar 3 January 2019 + show all updates

1. 3 January 2019

   Added Welsh language translation.

2. 2 January 2019

   First published.