Hwb sylweddol i bobl ifanc yng Nghymru - 12 Canolfan Ieuenctid newydd a chyllid cymorth cyflogaeth datganoledig yn cael eu cyhoeddi
Bydd pobl ifanc yng Nghymru yn elwa o gymorth cyflogaeth ehangach drwy 12 Canolfan Ieuenctid newydd arall wrth i’r Llywodraeth barhau i ddarparu cyfleoedd ledled y wlad.
- Mae 12 lleoliad newydd ar gyfer Canolfannau Ieuenctid wedi cael eu cadarnhau yng Nghymru, fel rhan o 80 a fydd yn cael eu lansio ledled Prydain Fawr
- Mae Llywodraeth y DU wedi cyflwyno cynlluniau i ddatganoli cyllid cymorth cyflogaeth nad yw’n dod o dan y Ganolfan Byd Gwaith i Lywodraeth Cymru
- Mae swm cychwynnol o £20 miliwn eisoes wedi cael ei roi i Gymru i ariannu prosiect Blaengaredd ar gyfer Anweithgarwch Economaidd, gyda chynllun tymor hwy bellach wedi’i gytuno
Bydd pobl ifanc yng Nghymru yn elwa o gymorth cyflogaeth ehangach drwy 12 Canolfan Ieuenctid newydd arall wrth i’r Llywodraeth barhau i ddarparu cyfleoedd ledled y wlad.
Mae Canolfannau Ieuenctid yn dod â’r Ganolfan Byd Gwaith, gwasanaethau awdurdodau lleol, cyflogwyr a darparwyr hyfforddiant at ei gilydd o dan yr un to i gefnogi pobl ifanc 16-24 oed.
Fel rhan o hyn, bydd pob Canolfan Ieuenctid yn bodloni set o safonau sylfaenol, gan sicrhau bod pobl ifanc yn gallu cael gafael ar gymorth canolfan waith ar y safle ochr yn ochr â chymorth iechyd meddwl a thai, cyfleoedd sgiliau a hyfforddiant, arweiniad gyrfaoedd a chysylltiadau uniongyrchol â chyflogwyr sydd â chyfleoedd gwaith a phrentisiaeth byw.
Daw’r broses ehangu hon wrth i Lywodraeth y DU gytuno i drosglwyddo rheolaeth dros ragor o gyllid cymorth cyflogaeth, yn ogystal â throsglwyddo hyd at £20 miliwn o gyllid ar gyfer y Cynlluniau Peilot Blaengaredd ar gyfer Anweithgarwch Economaidd ar draws 2025-26 i 2026-27.
Bydd y cyllid hwn yn galluogi Llywodraeth Cymru i ddylunio rhaglenni cyflogaeth lleol, gan sicrhau bod penderfyniadau ynghylch cael pobl yn ôl i waith yn cael eu rhoi yn nwylo arweinwyr lleol sy’n adnabod eu cymunedau orau.
Fel rhan o’r Warant Ieuenctid, bydd pob ardal ym Mhrydain Fawr yn cynnal Canolfan Ieuenctid i sefydlu rhwydwaith cenedlaethol a mynd i’r afael â’r bron i filiwn o bobl ifanc nad ydynt yn ennill cyflog nac yn dysgu - cynnydd o 2450000 rhwng 2021 a 2024 - er mwyn i bob person ifanc allu symud ymlaen lle bynnag mae’n byw.
Dywedodd Pat McFadden, yr Ysgrifennydd Gwaith a Phensiynau:
Mae pobl ifanc ledled Cymru yn cael hwb mawr heddiw.
Rydyn ni’n darparu cymorth ym mhob rhanbarth, yn cysylltu pobl ifanc â chyflogwyr ac yn cwrdd â nhw yn eu hardaloedd er mwyn iddyn nhw allu cymryd y cam cyntaf i fyd gwaith, wrth i ni droi’r wladwriaeth les yn wladwriaeth waith.
Ac mae datganoli cyllid cymorth cyflogaeth i Gymru yn rhoi’r pŵer i helpu pobl yn ôl yn nwylo arweinwyr lleol sy’n adnabod eu cymunedau orau.”
Dywedodd Jo Stevens, Ysgrifennydd Gwladol Cymru:
Bydd mwy o bobl ifanc yng Nghymru yn cael y cymorth sydd ei angen arnyn nhw i gael y swydd gyntaf hanfodol honno drwy ehangu Canolfannau Ieuenctid Llywodraeth y DU i fwy o gymunedau.
Bydd y Canolfannau Ieuenctid newydd hyn, o Gaerffili i Gonwy, yn darparu cymorth wedi’i deilwra, mynediad at gyfleoedd hyfforddi a chysylltiadau â chyflogwyr sydd â swyddi gwag er mwyn i bobl ifanc allu dysgu ac ennill cyflog a chael yr holl gyfleoedd maen nhw’n eu haeddu.
Rydyn ni’n gwybod bod darparwyr gwasanaethau lleol yn deall anghenion pobl sy’n byw yn eu cymunedau a beth yw’r ffordd orau o’u cefnogi. Dyna pam rydyn ni’n datganoli’r cyllid ar gyfer cymorth cyflogaeth i Lywodraeth Cymru i’w helpu i gael mwy o bobl i fyd gwaith.”
Dywedodd Jack Sargeant, y Gweinidog Sgiliau Llywodraeth Cymru:
Mae cyhoeddiad heddiw yn gam mawr ymlaen i bobl ifanc ledled Cymru. Mae’n gwella ein Gwarant i Bobl Ifanc sydd eisoes wedi bod o fudd i 64,000 o bobl ifanc yn ystod tymor y Llywodraeth hon.
Mae’r 12 Canolfan Ieuenctid newydd, ynghyd â chyllid cymorth cyflogaeth datganoledig, yn golygu y gall arweinwyr lleol ddylunio rhaglenni sy’n wirioneddol adlewyrchu anghenion eu cymunedau.
Mae trosglwyddo rheolaeth dros gyllid gwerth £20 miliwn y prosiect Blaengaredd ar gyfer Anweithgarwch Economaidd i Lywodraeth Cymru yn golygu mai’r rheini sy’n adnabod eu cymunedau orau sy’n gwneud penderfyniadau ynghylch cael pobl yn ôl i fyd gwaith.
Dyma ddatganoli yn gweithio ar ei orau, a bydd yn helpu i sicrhau bod yr holl bobl ifanc yng Nghymru yn gallu cyflawni eu potensial a chreu dyfodol gwell, lle bynnag maen nhw’n byw.”
Mae’r 12 Canolfan Ieuenctid newydd yn rhan o ymrwymiad i lansio un mewn mwy na 360 o ardaloedd ledled Prydain Fawr dros y tair blynedd nesaf.
Mae cyhoeddiad heddiw yn rhan o’r buddsoddiad gwerth £2.5 biliwn yn y Warant Ieuenctid a newidiadau i’r Ardoll Twf a Sgiliau i flaenoriaethu prentisiaid ifanc sydd, gyda’i gilydd, yn creu 200,000 o swyddi a chyfleoedd prentisiaeth.
Mae hyn yn cynnwys Grant Swyddi Ieuenctid gwerth £3,000 i gyflogwyr ar gyfer pob person ifanc rhwng 18 a 24 oed maen nhw’n ei gyflogi sydd wedi bod ar Gredyd Cynhwysol am chwe mis, Gwarant Swyddi estynedig i bobl ifanc 18-24 oed, a phrentisiaethau sylfaen newydd mewn sectorau allweddol.
Dyma’r cam diweddaraf yn ymrwymiad y Llywodraeth i sicrhau bod pob person ifanc yn cael cyfle i ennill cyflog neu ddysgu.
Gwybodaeth ychwanegol:
Lleoliadau’r Canolfannau Ieuenctid Newydd:
Caerffili; Rhondda Cynon Taf; Merthyr Tudful; Torfaen; Castell-nedd Port Talbot; Casnewydd; Sir Ddinbych; Conwy; Wrecsam; Ynys Môn; Sir Benfro; Sir Gaerfyrddin
Canolfannau Ieuenctid Presennol:
Blaenau Gwent; Pen-y-bont ar Ogwr; Abertawe