Staff eithriadol y Llysoedd a’r Tribiwnlysoedd yn cael eu cydnabod gyda gwobrau gan y Palas
Mae'r cyfraniad a wnaed gan staff GLlTEM i gadw'r system gyfiawnder yn rhedeg yn ystod pandemig COVID-19 wedi cael ei gydnabod gan y Frenhines.
Mae dau o’n cydweithwyr wedi derbyn gwobrau yn Anrhydeddau’r Flwyddyn Newydd eleni am eu gwaith i gyflwyno ffyrdd newydd cyflym o weithio ar ddechrau’r pandemig.
Mae dau arall o’n staff wedi cael eu hanrhydeddu am eu cyfraniad rhagorol i feysydd eraill.
Dywedodd Kevin Sadler, Prif Weithredwr Dros Dro GLlTEM:
Mae pob un o’n pedwar aelod o staff sy’n derbyn gwobrau gan y Frenhines yn glod gwirioneddol i GLlTEM. Roeddwn yn falch o glywed eu bod wedi cael eu cydnabod fel hyn a dylent i gyd fod yn falch o’r cyflawniad aruthrol hwn.
Rwy’n falch o’r holl bobl yn GLlTEM ac rwy’n gwybod mai dim ond rhan fechan yw hyn o ran y dalent, y profiad a’r dyfeisgarwch eithriadol ar draws ein sefydliad.
Roeddwn yn arbennig o falch o weld cydnabyddiaeth am y ffordd y mae ein staff wedi ymateb i bandemig COVID-19. Rwy’n gwybod faint o ymdrech mae pobl wedi’i wneud ar draws GLlTEM i gadw llysoedd a thribiwnlysoedd yn rhedeg ers mis Mawrth diwethaf – mae’r gwaith hwnnw wedi cael ei gydnabod yn ffurfiol gyda’r anrhydeddau hyn.
Gwasanaethau ar-lein – Y Llys Teulu
Am ei gwaith yn y llys teulu yn ystod y pandemig, dyfarnwyd OBE i Rebecca Cobbin, Rheolwr Cymorth Awdurdodaethau a Gweithrediadau.
Bu Rebecca, sydd wedi gweithio yn y gwasanaeth llysoedd ers 33 mlynedd, a’i thîm yn hyrwyddo proses ar-lein a oedd yn ei gwneud yn haws i rieni wneud trefniadau yng nghyswllt eu plant. Fe wnaethant hefyd greu canllawiau ar sut i flaenoriaethu ceisiadau gwaharddeb, pan ddechreuodd achosion o gam-drin domestig godi yn ystod y cyfyngiadau symud cyntaf.
Ond yng ngeiriau Rebecca, nid yw hyn yn anarferol ac mae llawer o’i chydweithwyr yn mynd y tu hwnt i’r hyn a ddisgwylir ganddynt i helpu defnyddwyr y llys.
Gwrandawiadau o bell mewn tribiwnlysoedd
Yn y cyfamser, am ei waith mewn tribiwnlysoedd Anghenion Addysgol Arbennig ac Anableddau (SEND), mae’r Rheolwr Cyflawni Jason Greenwood, sy’n gweithio yn Darlington, wedi cael ei gydnabod gydag MBE.
Defnyddiodd Jason wybodaeth am blatfform fideo’r cwmwl (CVP) i ganiatáu i fwy o wrandawiadau o bell gael eu cynnal ar ddechrau’r pandemig. Nid yn unig y gwnaeth hyn arwain at beidio â chanslo gwrandawiadau, ond mae tîm Jason yn credu eu bod wedi gallu gwrando mwy o achosion na phe bai pob gwrandawiad yn cael ei gynnal yn bersonol.
Dywedodd Jason, sydd wedi gweithio yn y tribiwnlys ers bron i 20 mlynedd:
Er bod y wobr wedi’i dyfarnu i mi, mae’r tîm cyfan, y farnwriaeth a’r defnyddwyr gwasanaeth yn haeddu’r clod hefyd.
Hyrwyddwr iechyd a lles
Am ei hymdrechion i wella iechyd a lles ei chydweithwyr, dyfarnwyd MBE i Reolwr Tîm Cyfreithiol y Llys Teulu, Tracy Etienne.
Mae Tracy, sy’n gweithio yn rhanbarth Swydd Gaer a Glannau Mersi ac a oedd gynt yn gweithio yng Nghymru, wedi bod yn hyfforddwr ffitrwydd cymwysedig ers dros 20 mlynedd.
Defnyddiodd y sgiliau hynny i lansio llawer o fentrau gan gynnwys cynhyrchu canllawiau ymarfer corff a fideos i gydweithwyr. Mae hi hefyd wedi codi mwy na £3,000 ar gyfer hosbis drwy gynnal dosbarthiadau ffitrwydd i gydweithwyr yn gyfnewid am rodd.
Dywedodd Tracy:
Roedd fy mam wedi gwirioni pan ddywedais wrthi, ac o ganlyniad, treuliodd y diwrnod cyfan ar y ffôn yn dweud wrth ei ffrindiau.
Roedd Mam yn rhan o’r genhedlaeth Windrush, a fi yw’r unigolyn cyntaf yn ein teulu i fynd i’r brifysgol hyd yn oed, heb sôn am dderbyn MBE!
Codi arian i elusen
Yn olaf, mae Ann Gumery wedi derbyn Medal Yr Ymerodraeth Brydeinig am godi arian i elusen drwy gyfres o deithiau cerdded a dringo.
Dros yr 20 mlynedd diwethaf, mae Ann wedi cwblhau heriau gan gynnwys cerdded 100km ar draws y Sahara, ac eto yn Jordan, dringo Kilimanjaro ddwywaith, cwblhau Llwybr y Cymer a cherdded hyd Wall Hadrian.
Ysgogwyd yr ymdrechion hyn, yn ôl yn 2001, pan welodd Ann fideo corfforaethol gan Macmillan Cancer Care. Tarodd hyn yn agos at adref i Ann gan ei bod wedi colli ei mab pedair oed, David, i ganser yn 1983.
Yn 2019, i ddathlu ei phen-blwydd yn drigain oed a beth fyddai wedi bod yn ben-blwydd David yn ddeugain oed, cerddodd hi a’i theulu 40 km ar draws bryniau Malvern yn Swydd Gaerwrangon, gan godi arian ar gyfer Ysbyty Plant Birmingham, a oedd wedi gofalu am David.