Cyhoeddi dadansoddiad o broses gwrandawiadau fideo’r llysoedd a’r tribiwnlysoedd
Mae gwerthusiad annibynnol o wasanaeth gwrandawiadau fideo GLlTEM, sy'n asesu profiad y defnyddiwr o'r broses gwrandawiadau fideo, wedi cael ei gyhoeddi heddiw.
- dengys adroddiad newydd bod gwrandawiadau fideo yn hwylus, yn gadarn ac yn hawdd i’w ddefnyddio
- mae’r broses o brofi gwrandawiadau fideo wedi cael ei ymestyn i dribiwnlysoedd treth. Awdurdodaethau eraill i ddilyn
- erys penderfyniadau ynghylch y defnydd o wrandawiadau fideo yn fater i ddisgresiwn y farnwriaeth
Mae’r gwasanaeth gwrandawiadau fideo yn galluogi cyfranogwyr i gymryd rhan mewn gwrandawiad o’u cartref, o swyddfa neu leoliad addas arall gan ddefnyddio gliniadur neu gyfrifiadur.
Mae’r adroddiad, sy’n cynnwys sampl fach o achosion a astudiwyd yn fanwl, yn cynnwys nifer o argymhellion ar ganllawiau i gyfranogwyr a swyddogaethau’r gwasanaeth. Mae nifer o’r rhain eisoes wedi’u rhoi ar waith, gan fod y gwasanaeth yn ymateb yn gyflym i adborth gan ddefnyddwyr a barnwyr.
Datblygodd GLlTEM y gwasanaeth i ddyblygu’r profiad ffurfiol o wrandawiad a gynhelir mewn llys neu dribiwnlys. Mae’r broses o brofi’r gwasanaeth yn mynd rhagddo’n gyflym. Mae wedi cael ei ymestyn i’r tribiwnlys treth a bydd awdurdodaethau eraill yn dilyn.
Meddai Susan Acland-Hood, Prif Weithredwr GLlTEM:
Rwy’n croesawu’r adroddiad hwn a’i asesiad gwerthfawr o’r cynllun peilot mewn perthynas â’r gwrandawiadau fideo sy’n cael eu cynnal yn y llysoedd sifil, teulu a threth. Bydd yn ychwanegu at y sylfaen dystiolaeth bresennol ar gyfer gwrandawiadau fideo ac yn ein galluogi i wneud rhagor o welliannau.
Mae technoleg sain a fideo wedi bod yn rhan o’r system gyfiawnder ers tro ac mae’n adnodd hollbwysig i gynnal ein system gyfiawnder yn ystod y pandemig a thu hwnt.
Bydd gwaith yn parhau i ddatblygu a phrofi’r gwasanaeth gwrandawiadau fideo i ddarparu opsiwn o bell lle y bo’n briodol, pan na all neu lle nad oes angen i gyfranogwyr fynychu’r llys. Y barnwyr sydd i wneud penderfyniadau ynghylch defnyddio technoleg fideo mewn gwrandawiadau.
Bydd y defnydd o wrandawiadau o bell yn ystod argyfwng COVID-19 yn cael ei werthuso, a chyhoeddir y canfyddiadau ar ôl iddo gael ei gwblhau.
Nodiadau i olygyddion:
- cynhaliodd London School of Economics (LSE) yr astudiaeth, Video Hearings Process Evaluation (Phase 2) o fis Mawrth March 2019 i fis Mawrth 2020.
- gellir gweld yr adroddiad Video Hearings Process Evaluation (Phase 2)
- gellir darllen adroddiad cyntaf LSE Implementing Video hearings (Party-to-State) - A Process Evaluation
- mae’r dadansoddiad yn adrodd ar ganfyddiadau 23 gwrandawiad, a ymgorfforodd gyfweliadau manwl â chyfranogwyr gan gynnwys dinasyddion, gweithwyr proffesiynol cyfreithiol, barnwyr a phartïon â diddordeb.