Tŷ’r Cwmnïau a’r Swyddfa Eiddo Deallusol (IPO) yn uno i rybuddio am geisiadau am daliadau digymell
Mae Tŷ’r Cwmnïau a’r IPO yn rhybuddio busnesau am geisiadau am daliadau digymell a sut i’w nodi.
Mae Tŷ’r Cwmnïau a’r IPO yn gofyn i fusnesau fod yn wyliadwrus o geisiadau camarweiniol am daliadau, a anfonir gan sefydliadau nad ydynt yn gysylltiedig â’r llywodraeth.
Mae’r ceisiadau hyn fel arfer ar ffurf anfonebau sy’n gofyn am daliad am wasanaethau Tŷ’r Cwmnïau a’r IPO.
Beth i fod yn wyliadwrus ohono
Fel arfer, caiff anfonebau eu hanfon drwy’r post i gyfeiriad swyddfa gofrestredig y cwmni, ond gellir eu hanfon drwy e-bost hefyd. Gall yr anfonebau hyn ofyn am daliad am bris uchel iawn ar gyfer gwasanaethau sydd ar gael am ffi llawer is – neu am ddim – yn uniongyrchol o’r ffynonellau cyfreithlon: Tŷ’r Cwmnïau, Cyfreithwyr Eiddo Deallusol neu’r IPO.
Maent fel arfer yn gofyn am daliad i:
- osod neu hawlio eich cyfrif Tŷ’r Cwmnïau ar-lein
- dilysu eich cyfrif Tŷ’r Cwmnïau neu wirio eich manylion
- adnewyddu eich nod masnach neu ei gynnwys ar ‘gofrestr ar-lein unigryw’
Sut i wirio a yw llythyr neu e-bost yn ddilys
Os byddwch yn cael llythyr neu e-bost yn gofyn am daliad ac nad ydych yn siŵr os yw’n ddilys, gallwch:
- wirio unrhyw gyfeiriadau gwefan sydd yn y llythyr neu’r e-bost, a chyfeiriadau e-bost o safleoedd generig – darperir gwasanaethau swyddogol Tŷ’r Cwmnïau a’r IPO drwy GOV.UK
- chwilio am ymadawiadau sy’n nodi nad yw’r sefydliad yn gysylltiedig â’r llywodraeth
- cysylltu â ni’n uniongyrchol i wirio unrhyw geisiadau
Os ydych yn dewis trydydd parti i gynrychioli eich cwmni, efallai y bydd angen i chi dalu am eu gwasanaethau. Gall y rhain fod yn fusnesau dilys sy’n cynnig gwasanaethau ar wahân i’r rhai a ddarperir yn uniongyrchol gan Dŷ’r Cwmnïau a’r IPO.
Rhoi gwybod am gyswllt amheus
Os ydych chi’n ansicr ynglŷn â llythyr neu e-bost sydd wedi dod i law, cysylltwch â Thŷ’r Cwmnïau, yr IPO neu’r sefydliad sy’n cynrychioli eich cwmni’n uniongyrchol cyn gwneud unrhyw daliad.
- Cysylltu â Thŷ’r Cwmnïau
- Cysylltu ag IPO ag misleadinginvoices@ipo.gov.uk
Dylech roi gwybod am weithgarwch amheus i Adrodd Twyll, a’ch swyddfa Safonau Masnach leol. Os ydych chi’n credu eich bod wedi dioddef twyll, dylech roi gwybod am hyn i’r heddlu drwy Adrodd Twyll.