Alun Cairns yn ymweld â pharth cefnogwyr yng Nghaerdydd cyn gêm gynderfynol hanesyddol Cymru ym mhencampwriaeth Euro 2016.
Mae Alun Cairns wedi ymweld â pharth cefnogwyr yng Nghaerdydd cyn gêm gynderfynol Cymru yn erbyn Portiwgal ym mhencampwriaeth Euro 2016.
Mae Stadiwm Principality yn ddelfrydol ar gyfer tyrfa lond y lle i fwynhau’r achlysur arbennig hwn, am ddim, mewn amgylchedd sy’n addas i’r teulu. Mae pencampwriaeth Euro 2016 wedi gwneud Cymru yn wlad falch dros ben ac mae llwyddiant tîm pêl-droed y wlad yn golygu bod Cymru wedi mynd cam ymhellach eto yn y bencampwriaeth Ewropeaidd.
Mewn cyfnod o ffyniant economaidd yng Nghymru, y gobaith yw gafael yn ysbryd y pencampwriaethau a denu rhagor o gyfleoedd buddsoddi o’r tu allan.
Dywedodd Alun Cairns, Ysgrifennydd Gwladol Cymru:
Mae tîm pêl-droed Cymru nid yn unig wedi ysbrydoli ein cenedl ni, ond y Deyrnas Unedig gyfan hefyd gyda’i gynnydd ffantastig drwy bencampwriaethau Euro 2016.
Dan arweiniad rheolwr gwych, mae’r tîm hwn wedi cyflawni perfformiadau angerddol sydd wedi rhoi gwefr i bawb ohonom ni ac wedi codi calon y wlad. Mae’n rhaid troi at fuddugoliaeth stori tylwyth teg Clwb Pêl-droed Dinas Caerlŷr am rywbeth yr un modd ysbrydoledig. Mae’r tîm hwn o Gymru wedi creu hanes o ddifrif.
Heno, bydd y tîm unwaith eto’n cynnal gobeithion y genedl wrth i’r bechgyn wynebu Portiwgal. Pob lwc, ac ewch yr holl ffordd i’r rownd derfynol.