Trawsnewid gorsaf drenau Caerdydd Canolog i bawb
Bydd yr orsaf wedi'i thrawsnewid yn gwella cysylltiadau rhwng Cymru a gweddill y DU, gan chwalu rhwystrau i deithio a swyddi.
Cardiff Central Station: artist's impression.
- cynllun uchelgeisiol i drawsnewid gorsaf reilffordd brysuraf Cymru yn cael sêl bendith terfynol gan Lywodraeth y DU
- teithwyr yng Nghaerdydd Canolog i elwa o fynedfa newydd, cyntedd fwy, a gwell hygyrchedd, diolch i £77.8 miliwn o fuddsoddiad gan Lywodraeth y DU
- mae gwelliannau yn rhan o fuddsoddiad i gael mwy o drenau a gorsafoedd newydd ledled Cymru sy’n cefnogi swyddi ac yn chwalu rhwystrau i deithio
Bydd teithwyr sy’n teithio drwy Gaerdydd Canolog yn elwa o orsaf drenau wedi’i hailwampio, diolch i dros £77 miliwn a gymeradwywyd gan y Llywodraeth, a gyhoeddwyd heddiw (4 Rhagfyr 2025).
Bydd y prosiect yn gweld trawsnewid gorsaf reilffordd brysuraf Cymru yn llwyr, gyda mynedfa ddeheuol nodedig newydd, prif gyntedd mwy a phlatfform 0 estynedig i gynyddu capasiti yn yr orsaf sy’n croesawu dros 35,000 o bobl y dydd – a miloedd yn rhagor yn ystod digwyddiadau mawr fel y Chwe Gwlad.
Mae’r cyllid hwn yn cymryd cyfanswm Llywodraeth y DU ar gyfer y prosiect i foderneiddio gorsaf drenau Caerdydd Canolog i £77.8 miliwn, sy’n cael ei gefnogi gan £40 miliwn ychwanegol gan Fargen Ddinesig Prifddinas-Ranbarth Caerdydd a £21 miliwn gan Lywodraeth Cymru.
Mae’r prosiect hwn yn rhan o fuddsoddiad ehangach o £445 miliwn gan yr Adran Drafnidiaeth i gyflawni gwelliannau i seilwaith rheilffyrdd ledled Cymru gyfan, gan gynnwys mwy o wasanaethau trên i Gaerdydd, gorsafoedd newydd yn Ne Cymru, a mwy o wasanaethau ar brif linell Gogledd Cymru a llinell Wrecsam-Lerpwl.
Ochr yn ochr â’r cyllid, mae’r achos busnes terfynol ar gyfer y trawsnewid wedi’i gymeradwyo, gan roi sêl bendith i’r gwaith ddechrau yng Ngwanwyn 2026, gyda’r rhan fwyaf o’r gwaith wedi’i gwblhau erbyn 2029.
Ar ôl ei chwblhau, bydd yr orsaf wedi’i thrawsnewid hefyd yn gwella cysylltiadau rhwng gweddill Cymru a’r DU ehangach, gan chwalu rhwystrau i deithio, swyddi a chyfleoedd, gan roi hwb i dwf economaidd.
Dywedodd Heidi Alexander, Ysgrifennydd Gwladol dros Drafnidiaeth:
Bydd y gwelliannau i Gaerdydd Canolog yn trawsnewid profiad y miliynau o deithwyr sy’n defnyddio’r orsaf bob blwyddyn, gan groesawu pobl drwy orsaf eang, fodern sy’n addas i’r ddinas y mae’n ei gwasanaethu.
Nid yn unig y bydd hyn yn gwella profiadau i deithwyr, ond bydd hefyd yn gwella capasiti yn yr orsaf ac yn datgloi cysylltedd â gweddill Cymru a thu hwnt – gan gefnogi swyddi a helpu i roi hwb i dwf economaidd.
Mae cynlluniau hefyd yn cynnwys gatiau tocynnau gwell i wella mynediad a llif o amgylch yr orsaf ac yn hwyluso cysylltiadau â ffyrdd eraill o deithio. Mae manteision eraill i gwsmeriaid yn cynnwys ardaloedd aros gwell, offrymau manwerthu gwell a chyfleusterau storio beiciau.
Dywedodd Jo Stevens, Ysgrifennydd Gwladol Cymru:
Mae llywodraeth y DU yn buddsoddi mewn gwella gwasanaethau rheilffyrdd yng Nghymru gyda gorsafoedd newydd, trenau cyflymach a mwy o wasanaethau sy’n cysylltu pobl â’r swyddi sy’n talu’n dda rydym yn eu creu ledled y wlad ac yn gyrru ein twf economaidd.
Mae ein cyfraniad at ariannu ailddatblygu Gorsaf Caerdydd Canolog yn rhan allweddol o’r rhaglen hon a bydd gorsaf fwyaf Cymru yn cael ei thrawsnewid i wella profiad teithwyr drwy liniaru tagfeydd a gwneud yr orsaf yn fwy hygyrch.
Bydd y gwelliannau yn lliniaru gorlenwi a thagfeydd, gan alluogi gwell hygyrchedd i’r rhai sydd â symudedd llai.
Ochr yn ochr â’r buddsoddiad o £445 miliwn, mae’r llywodraeth yn darparu £50 miliwn arall ar gyfer gorsaf Caerdydd Metro newydd gyda chysylltiad uniongyrchol â Bae Caerdydd, gan baratoi’r ffordd ar gyfer estyniad i’r gogledd-orllewin a’r dwyrain o Gaerdydd yn y dyfodol.
Dywedodd Ken Skates, Ysgrifennydd y Cabinet dros Drafnidiaeth a Gogledd Cymru:
Mae hon yn garreg filltir bwysig i’n cynlluniau uchelgeisiol i uwchraddio gorsaf Caerdydd Canolog.
Bydd y buddsoddiad o £140 miliwn ar y cyd rhwng llywodraeth Cymru, llywodraeth y DU a Phrifddinas-ranbarth Caerdydd yn moderneiddio ac yn gwella’r orsaf, gan fod o fudd i deithwyr ac yn darparu ar gyfer ein huchelgeisiau ar gyfer twf hirdymor
Mae hyn yn dangos sut y gall 2 lywodraeth sy’n gweithio mewn partneriaeth fynd i’r afael â thanariannu hanesyddol rheilffyrdd Cymru ac edrychaf ymlaen at fwy o ddatblygiadau trafnidiaeth mawr yn symud ymlaen ledled Cymru.
Dywedodd Alexia Course, Prif Swyddog Masnachol Trafnidiaeth Cymru:
Mae cymeradwyo’r achos busnes llawn yn rhoi sêl bendith i ni fwrw ymlaen â’n cynlluniau i gyflawni gwelliannau mawr sydd eu hangen i orsaf Caerdydd Canolog.
Mae’r buddsoddiad sydd i fyny at £140 miliwn yn golygu y gallwn gyflawni gwelliannau i’r orsaf i’w gwneud yn addas ar gyfer prifddinas a chynnal twf yn y dyfodol, gan ddarparu profiad gwell i gwsmeriaid ein gorsafoedd.
Gan weithio gyda’n contractwr dylunio ac adeiladu, gallwn nawr symud ymlaen gyda dechrau’r gwaith adeiladu y flwyddyn nesaf.
Rail and major projects media enquiries
Media enquiries 0300 7777878
Switchboard 0300 330 3000