Datganiad i'r wasg

7 awgrym ar gyfer modurwyr i aros yn ddiogel ar-lein

Gyda sgamiau ar-lein newydd yn dod i’r amlwg drwy'r amser, mae modurwyr wedi dod yn darged cynyddol i dwyllwyr. Mae DVLA wedi datgelu bod eu canolfan gyswllt wedi derbyn 1,275 o adroddiadau ynglŷn â sgamiau treth cerbydau amheus yn ystod y 3 mis olaf o 2018.

• Gan: Asiantaeth Trwyddedu Gyrwyr a Cherbydau
• Cyhoeddwyd: 5 February 2019

Ar Ddiwrnod Defnyddio’r Rhyngrwyd yn Fwy Diogel, mae DVLA wedi darparu’r awgrymiadau canlynol i helpu modurwyr i aros yn ddiogel ar-lein.

1) Defnyddiwch GOV.UK yn unig

Wrth edrych am wybodaeth neu ddefnyddio ein gwasanaethau ar-lein, sicrhewch eich bod yn defnyddio gwefan GOV.UK fel y gallwch chi fod yn siŵr eich bod yn delio’n uniongyrchol â DVLA.

2) Negeseuon e-bost sgam

Nid ydym byth yn anfon negeseuon e-bost sy’n gofyn ichi gadarnhau eich manylion personol na gwybodaeth am daliadau. Os cewch unrhyw beth fel hyn, peidiwch ag agor unrhyw ddolenni a dylech ddileu’r e-bost ar unwaith.

3) Byddwch yn wyliadwrus o wefannau camarweiniol

Cadwch lygaid ar agor am wefannau trydydd parti allai fod yn gamarweiniol. Bydd y gwefannau hyn yn aml yn cynnig i’ch helpu i wneud cais am drwydded yrru neu drethu’ch car ond yn debygol o godi ffioedd ychwanegol am wasanaethau y gallech eu cael am ddim neu am gost is ar GOV.UK.

4) Byddwch yn wyliadwrus o rifau ffôn cyfradd premiwm

Byddwch yn wyliadwrus o wefannau sy’n cynnig eich cysylltu â’n canolfan gyswllt, gan eu bod fel arfer yn rhifau ffôn cyfradd premiwm. Bydd rhifau ffôn ein canolfan gyswllt ond yn dechrau gyda 0300 – sy’n costio’r un fath â galwad lleol.

5) Byddwch yn ymwybodol o beth rydych chi’n ei rannu ar-lein

Peidiwch byth â rhannu delweddau o’ch trwydded yrru na dogfennau cerbyd ar-lein. Gallai’r wybodaeth bersonol hon fod yn amhrisiadwy i’r rhai sy’n bwriadu dwyn hunaniaeth cerbyd neu ei berchennog.

6) Negeseuon testun

Nid ydym byth yn anfon negeseuon testun ynghylch ad-daliadau treth cerbyd. Mae sgamiau negeseuon testun yn aml yn gofyn ichi ddilyn dolen i ddarparu manylion cerdyn credyd. Peidiwch byth â chlicio ar y ddolen a dylech ddileu’r neges destun ar unwaith.

7) Adroddwch am unrhyw sgamiau amheus

Os ydych chi’n pryderu am unrhyw alwadau ffôn, negeseuon testun, negeseuon e-bost neu weithgaredd ar-lein amheus, dylech roi gwybod i’r Heddlu trwy Action Fraud ar unwaith.

Dywedodd Dave Pope, Prif Swyddog Diogelwch Gwybodaeth yn DVLA:

Wrth chwilio am fanylion cyswllt neu unrhyw un o wasanaethau digidol DVLA, dylech ddefnyddio GOV.UK yn unig fel y gallwch chi fod yn siŵr eich bod yn delio’n uniongyrchol â DVLA.

Mae postio ar gyfryngau cymdeithasol yn ffordd o fyw ar gyfer y rhan fwyaf o yrwyr, ond efallai na fyddant yn sylweddoli eu bod yn peryglu eu hunain fel prif darged ar gyfer gweithgarwch twyllodrus.

Gall pobl aros un cam ymlaen y troseddwyr trwy fod yn wyliadwrus gyda’u gwybodaeth bersonol a phwy y maent yn ei rhannu â hwy, ac yn adrodd am unrhyw beth amheus i’r heddlu trwy Action Fraud.

Dywedodd llefarydd ar ran Action Fraud:

Rydyn ni’n gwybod bod twyllwyr yn defnyddio ffyrdd mwy soffistigedig o dwyllo eu dioddefwyr o hyd, ac felly mae’n bwysig bod aelodau’r cyhoedd yn meddwl am eu hymddygiad ar-lein ac yn sicrhau eu bod yn gwneud popeth y gallent i ddiogelu eu hunain.

Gall cymryd camau fel cyfyngu ar faint o wybodaeth bersonol a rennir ar blatfformau cyfryngau cymdeithasol a bod yn wyliadwrus o unrhyw negeseuon a dderbynnir na ofynnwyd amdanynt yn gallu helpu i atal troseddau ar-lein.

Dylech bob amser fod yn ofalus wrth rannu gwybodaeth bersonol ar-lein. Gwiriwch bob amser mai pwy rydych chi’n delio â nhw mewn gwirionedd yw pwy maen nhw’n honni eu bod – er enghraifft, trwy ddefnyddio GOV.UK yn unig wrth ddefnyddio gwasanaethau’r llywodraeth ar-lein, fel DVLA.

Os ydych chi’n credu eich bod wedi dioddef twyll, rhowch wybod i ni trwy ein hofferyn adrodd ar-lein neu dros y ffôn 0300 123 2040.

Nodiadau i olygyddion

1. Ym mis Hydref, Tachwedd a Rhagfyr y llynedd, cofnododd canolfan gyswllt DVLA 1,275 o gwynion unigol ynglŷn â sgamiau amheus ar y we, e-bost, negeseuon testun neu gyfryngau cymdeithasol. Gallai’r ffigwr hon gynnwys adroddiadau lluosog am yr un digwyddiad.

2. Yn ôl Action Fraud, costiodd pob math o dwyll seiber tua £34.6 miliwn i ddioddefwyr rhwng Ebrill a Medi y llynedd.

3. Action Fraud yw canolfan adrodd cenedlaethol y DU ar gyfer twyll a seiberdroseddu lle dylech chi roi gwybod am dwyll os ydych wedi cael eich sgamio, troseddu neu wedi profi seiberdrosedd yng Nghymru, Lloegr a Gogledd Iwerddon.

4. Gellir adrodd am drosedd twyll neu seiberdrosedd i Action Fraud trwy ffonio 0300 123 2040 (dydd Llun i ddydd Gwener, 8am i 8pm), neu drwy ddefnyddio eu hofferyn adrodd ar-lein, sydd ar gael 24/7.

5. Bydd Diwrnod Defnyddio’r Rhyngrwyd yn Fwy Diogel 2019 yn cael ei ddathlu’n fyd-eang ddydd Mawrth 5 Chwefror. Nod Diwrnod Defnyddio’r Rhyngrwyd yn Fwy Diogel yw ysbrydoli sgwrs genedlaethol am ddefnyddio technoleg yn gyfrifol, yn barchus, yn feirniadol ac yn greadigol. Thema eleni yw ‘Rhyngrwyd gwell gyda’n gilydd’.

6. Mae’r ffigurau a ddarparwyd gan Action Fraud (Heddlu Dinas Llundain) yn dangos bod £34.6 miliwn wedi cael ei golli gan ddioddefwyr twyll seiber rhwng Ebrill a Medi yn unig y llynedd. Roedd 33% o’r holl dwyll a adroddwyd trwy negeseuon ffôn, 13% trwy werthiannau ar-lein a 12% trwy e-bost.

Swyddfa'r Wasg

Swyddfa'r Wasg y DVLA
Longview Road
Treforys
Abertawe
SA6 7JL

E-bost press.office@dvla.gov.uk

Dim ond ar gyfer newyddiadurwyr a'r wasg yn unig 0300 123 2407

Cyhoeddwyd ar 5 February 2019