Cyflwyno tystiolaeth i ategu’ch cais Gwasanaeth Gofal Plant
Defnyddiwch y ffurflen ar-lein i anfon y dystiolaeth y mae CThEF wedi gofyn amdani, i ategu eich cais am Ofal Plant sy’n Rhydd o Dreth neu Ofal Plant sy’n Rhad ac am Ddim i Rieni sy’n Gweithio.
Pryd i gyflwyno tystiolaeth
Mae angen i chi gyflwyno’ch tystiolaeth i CThEF o fewn 14 diwrnod calendr i gael cais sy’n gofyn amdani drwy lythyr neu drwy’r gwasanaeth negeseuon diogel.
Er enghraifft, os ydym yn anfon neges ddiogel atoch ar 12 Chwefror yn gofyn am dystiolaeth i ategu’ch cais, mae angen i chi gyflwyno’ch tystiolaeth ar neu cyn 25 Chwefror.
Os na fyddwch yn anfon y dystiolaeth atom o fewn 14 diwrnod, byddwn yn gwneud penderfyniad ar sail yr wybodaeth sydd gennym yn barod.
Pwy sy’n gallu cyflwyno tystiolaeth
Mae’n rhaid i’r dystiolaeth gael ei chyflwyno gan y person a wnaeth gais i fod yn ddeiliad y cyfrif Gwasanaeth Gofal Plant.
Yr hyn y bydd ei angen arnoch
I ddefnyddio’r ffurflen ar-lein, bydd angen y canlynol arnoch:
-
eich rhif Yswiriant Gwladol
-
y neges ddiogel neu’r llythyr a anfonwyd atoch
-
y dystiolaeth rydym wedi gofyn amdani yn y neges ddiogel neu’r llythyr
Gallwch uwchlwytho copi digidol o’r dogfennau rydym wedi gofyn amdanynt. Efallai y byddwn yn gofyn i chi anfon y dogfennau gwreiddiol yn nes ymlaen.
Cyflwyno’ch tystiolaeth
Defnyddiwch y ffurflen ar-lein i gyflwyno’ch tystiolaeth. Bydd angen arnoch y manylion mewngofnodi a ddefnyddiwyd gennych wrth gofrestru ar gyfer eich cyfrif Gwasanaeth Gofal Plant.
Yr hyn sy’n digwydd nesaf
Byddwn yn rhoi gwybod i chi os ydych yn gymwys ai peidio, fel arfer o fewn 15 diwrnod gwaith, naill ai:
-
drwy’r gwasanaeth negeseuon diogel
-
drwy lythyr
Os nad ydych yn gymwys, byddwn yn egluro sut y gallwch herio’r penderfyniad.