Talu ffi’r Cynllun Dilysu Diodydd Gwirodol
Sut i dalu eich ffi ddilysu ar gyfer y Cynllun Dilysu Diodydd Gwirodol, a pha mor hir mae’n ei gymryd i’ch taliad gyrraedd CThEF.
Os ydych yn gwneud cais i ymuno â’r Cynllun Dilysu Diodydd Gwirodol, bydd angen i chi dalu ffi. Gwiriwch faint bydd eich ffi dilysu ar gyfer:
- Wisgi Albanaidd (yn agor tudalen Saesneg)
- Wisgi Gwyddelig, Hufen Gwyddelig neu Wisgi Tatws Gwyddelig (yn agor tudalen Saesneg)
- Seidr Brandi Gwlad yr Haf (yn agor tudalen Saesneg)
- Wisgi Cymreig Brag Sengl
Ni ellir ad-dalu’r ffi dilysu ac mae y tu allan i gwmpas TAW.
Pam y mae’n rhaid i chi dalu
Mae CThEF yn rheoli’r cynllun dilysu gyda’r bwriad o adennill ein costau gweinyddol yn unig bob blwyddyn ariannol. Mae’r rhain yn cynnwys:
- salarïau
- gorbenion staff wrth iddynt gynnal y gwaith dilysu
- treuliau teithio staff
Byddwn yn cyhoeddi unrhyw newidiadau i’r ffioedd yn yr arweiniad technegol perthnasol ac anfon anfonebau atoch ar gyfer y ffioedd dilysu gan ddefnyddio’r wybodaeth a roesoch yn eich cais.
Bydd CThEF yn ymgynghori â’r diwydiant pe bai angen gwneud newidiadau sylweddol i’r strwythur ffioedd.
Ffi ddilysu newydd
O 1 Gorffennaf 2025 ymlaen, byddwn yn disodli’r ffioedd presennol gyda ffi ddilysu unffurf, sef £250 ar gyfer pob cyfleuster.
Byddwch yn talu’r ffi newydd:
- os bydd eich dilysiad presennol yn dod i ben ar neu ar ôl 1 Gorffennaf 2025
- ar gyfer ail-ymweliadau, gan gynnwys dilysu prosesau newydd a gwiriadau cydymffurfio
Bydd y ffi newydd ar waith hyd at 30 Mehefin 2031.
Bydd rhagor o fanylion yn cael eu hychwanegu at y dudalen hon unwaith i’r ffi newydd gael ei rhoi ar waith.
Pryd i dalu
Ar ôl i chi wneud cais i ymuno â’r cynllun, neu ar ôl i chi gyflwyno Ymrwymiad ar gyfer Wisgi Albanaidd (yn agor tudalen Saesneg), byddwn yn anfon anfoneb atoch sy’n cynnwys y ffi ar gyfer eich cofrestriad a’ch dilysiad.
Bydd angen i chi dalu’ch ffi:
- cyn bod modd trefnu ymweliad dilysu, os ydych yn gynhyrchydd yn y DU
- cyn pen 30 diwrnod i’r dyddiad sydd ar yr anfoneb
Os bydd y dyddiad cau ar y penwythnos neu ar ŵyl y banc, gwnewch yn siŵr bod eich taliad yn dod i law CThEF erbyn diwedd y diwrnod gwaith olaf cyn hynny.
Os na fyddwch yn talu
Byddwch yn cael un nodyn i’ch atgoffa nad yw’ch anfoneb wedi’i thalu. Os na ddaw eich taliad i law:
- ni fyddwch yn cael eich ymweliad dilysu, os ydych yn gynhyrchydd yn y DU
- cewch eich trin fel un nad yw’n cydymffurfio, a hynny o’r dyddiad yr ydym yn ei roi i chi
- caiff manylion eich cyfleusterau cynhyrchu dilys eu diwygio, eu dileu neu eu hepgor o’r gwasanaeth Cyfleuster Chwilio’r Cynllun Dilysu Diodydd Gwirodol (SDV)
- ni fydd unrhyw gynhyrchion sy’n cael eu cynhyrchu wedi’r dyddiad yr ydym yn ei roi i chi yn rhai dilys — caiff y manylion eu diwygio, eu dileu neu eu hepgor o’r rhestr o frandiau dilys yn y gwasanaeth chwilio
- mae’n bosibl y byddwn yn rhoi gwybod i’r awdurdod gorfodi dynodedig
Yr hyn y bydd ei angen arnoch
Bydd angen y cyfeirnod 14-rhif arnoch (er enghraifft, 18000012345678).
Gallwch ddod o hyd i’r rhif hwn ar yr anfoneb a anfonwyd atoch gan CThEF ar ôl i chi wneud cais i ymuno â’r Cynllun Dilysu Diodydd Gwirodol.
Os ydych yn defnyddio cyfeirnod anghywir, bydd oedi cyn i’r taliad gael ei ddyrannu’n gywir.
Talu ar-lein
Gallwch dalu drwy gymeradwyo taliad drwy’ch cyfrif banc ar-lein — gallwch wneud hyn drwy ddewis yr opsiwn ar gyfer talu drwy gyfrif banc.
Bydd gofyn i chi fewngofnodi i’ch cyfrif banc ar-lein, neu’r cyfrif banc ar eich ffôn symudol, i gymeradwyo’ch taliad.
Bydd angen i chi fod â’ch manylion bancio ar-lein wrth law er mwyn talu drwy’r dull hwn.
Fel arfer, bydd y taliad yn digwydd ar unwaith, ond weithiau mae’n gallu cymryd hyd at 2 awr i ymddangos yn eich cyfrif banc.
Talu drwy drosglwyddiad banc
Os byddwch yn talu drwy CHAPS (System Dalu Awtomataidd y Tŷ Clirio) neu Daliadau Cyflymach, bydd eich taliad yn dod i law ar yr un diwrnod gwaith, neu’r diwrnod gwaith nesaf.
Os byddwch yn talu drwy Bacs, dylech ganiatáu 3 diwrnod gwaith i’ch taliad gyrraedd CThEF.
Rydym yn argymell eich bod yn gwirio amserau prosesu ac uchafswm y terfynau trosglwyddo a osodir gan eich banc cyn i chi dalu.
Y manylion cyfrif i’w defnyddio os yw’ch cyfrif yn y DU
Defnyddiwch y manylion canlynol i wneud taliad os yw’ch cyfrif yn y DU:
- cod didoli — 20 50 46
- rhif y cyfrif — 73987795
- enw’r cyfrif — HMRC Accounts Receivable Receipts
Y manylion cyfrif i’w defnyddio os yw’ch cyfrif dramor
Defnyddiwch y manylion canlynol i wneud taliad os yw’ch cyfrif dramor:
- rhif y cyfrif (IBAN) — GB61 BARC 2050 4673 9877 95
- cod adnabod y busnes (BIC) — BARCGB22
- enw’r cyfrif — HMRC Accounts Receivable Receipts
Mae’n rhaid i chi wneud pob taliad mewn punnoedd sterling (GBP).
Os bydd angen, gallwch roi’r cyfeiriad canlynol fel cyfeiriad bancio CThEF i’ch banc chi:
Barclays Bank plc
1 Churchill Place
Llundain
Y Deyrnas Unedig
E14 5HP
Updates to this page
-
Added details of a new verification fee that will start on 1 July 2025.
-
Page updated to include references to Single Malt Welsh Whisky.
-
You can now pay the Spirit Drinks Verification Scheme fee using your online or mobile bank account.
-
Overseas payment details updated.
-
First published.