Canllawiau

Cyfrifoldeb Estynedig Cynhyrchwyr dros Becynwaith (pEPR): apêl yn erbyn penderfyniad a ddyroddwyd gan PecynUK

Cyhoeddwyd 2 Gorffennaf 2025

Gellir cyflwyno apêl i Dribiwnlys Haen Gyntaf (Cymru a Lloegr), y Comisiwn Apelau Cynllunio (Gogledd Iwerddon), Gweinidogion yr Alban neu’r siryf (yr Alban) os oes anghytundeb ynghylch penderfyniadau neu hysbysiadau penodol a wnaed gan PecynUK. 

Yr hyn y cewch apelio yn ei erbyn 

 Apêl cynhyrchydd: Penderfyniadau ynglŷn â ffioedd 

Mae cynhyrchydd neu gwmni daliannoli ^{[footnote 1]} yn cael apelio yn erbyn y penderfyniadau a ganlyn o dan reoliad 105(1)(a) a (b) a rheoliad 105(2:

• penderfyniad gan PecynUK i gyflwyno hysbysiad o atebolrwydd i dalu ffi waredu neu ffi weinyddol i’r cynhyrchydd neu’r cwmni daliannol (mewn perthynas ag aelodau perthnasol o’r grŵp o fewn cofrestriad grŵp) o dan reoliad 67
• penderfyniad gan PecynUK i gyflwyno hysbysiad o ffi ddiwygiedig i’r cynhyrchydd neu’r cwmni daliannol (mewn perthynas ag aelodau perthnasol o grŵp o’r fath) o dan reoliad 82

 Mae seiliau apêl mewn perthynas â’r penderfyniadau uchod fel a ganlyn:

• nad yw’r cynhyrchydd neu’r cwmni daliannol yn atebol mewn gwirionedd i dalu ffi waredu neu ffi weinyddol
• bod y swm yr aseswyd bod y cynhyrchydd neu’r cwmni daliannol yn atebol i’w dalu wedi’i gamgyfrifo

Apêl cynhyrchydd: Cosb ariannol newidiol 

Mae cynhyrchydd neu gwmni daliannol yn cael apelio yn erbyn hysbysiad cosb ariannol newidiol terfynol o dan reoliad 104(6)(a), sef sancsiwn sifil a ddyroddwyd o dan reoliad 121(1)(a)(ii).

 Mae seiliau’r apêl fel a ganlyn:  

• bod y penderfyniad i ddyroddi’r hysbysiad wedi’i seilio ar gamgymeriad ffeithiol
• bod y penderfyniad i ddyroddi’r hysbysiad yn anghywir yn y gyfraith
• bod swm y gosb a osodir yn afresymol
• bod y penderfyniad i ddyroddi’r hysbysiad yn afresymol am unrhyw reswm arall

 Apêl cynhyrchydd: Hysbysiad adennill costau gorfodi 

Mae cynhyrchydd neu gwmni daliannol yn cael apelio o dan reoliad 104(6)(b) yn erbyn hysbysiad adennill costau gorfodi a ddyroddwyd o dan reoliad 123. Mae’r penderfyniad hwn i adennill costau yn gysylltiedig â hysbysiad cosb ariannol newidiol sydd wedi’i gyflwyno ac sy’n ei gwneud yn ofynnol i gostau a ysgwyddwyd gan PecynUK gael eu talu. Mae’r costau’n cynnwys y canlynol: 

• costau ymchwilio
• costau gweinyddu
• costau sicrhau cyngor arbenigol (gan gynnwys cyngor cyfreithiol)

 Mae seiliau’r apêl wedi’u seilio ar anghytundeb â’r penderfyniad i wneud y canlynol: 

• gosod y gofyniad i dalu costau
• swm y costau hynny

 Apêl awdurdod lleol: Penderfyniadau ynglŷn â chostau gwaredu 

Mae awdurdod lleol yn cael apelio yn erbyn penderfyniad gan PecynUK ynglŷn â’r canlynol o dan reoliad 105(4):

• Rheoliad 105(4)(a)(i): penderfyniad sy’n asesu ei gostau gwaredu taladwy o dan Bennod 4 o Ran 5
• Rheoliad 105(4)(a)(ii): penderfyniad ynghylch y swm sydd i’w ddosbarthu i’r awdurdod perthnasol o dan Bennod 4 o Ran 5
• Rheoliad 105(4)(a)(iii): penderfyniad yn ailgyfrifo’i gostau gwaredu taladwy o dan Bennod 5 o Ran 5
• Rheoliad 105(4)(b): hysbysiad gan PecynUK o dan reoliad 76(6) ei fod yn bwriadu lleihau taliad i’r awdurdod perthnasol
• Rheoliad 105(4)(c): penderfyniad gan PecynUK o dan reoliad 77(5) lle mae wedi penderfynu ar gŵyn gan yr awdurdod perthnasol a bod y paragraff hwnnw’n gymwys, nad oedd yr wybodaeth a ddarparwyd gan yr awdurdod perthnasol i ategu’r gŵyn yn berthnasol i’w benderfyniad

Mae seiliau’r apêl mewn perthynas â’r penderfyniad y cyfeirir ato yn rheoliad 105(4)(a) fel a ganlyn:  

• bod costau gwaredu taladwy yr awdurdod perthnasol wedi’u camgyfrifo
• bod PecynUK wedi lleihau costau gwaredu’r awdurdod perthnasol pan nad oedd ganddo hawl i wneud hynny o dan reoliad 71(3) neu reoliad 72(8)
• bod PecynUK wedi methu â chydymffurfio â gofyniad gweithdrefnol ym Mhennod 4 o Ran 5 neu Bennod 5 o Ran 5 sy’n gymwys mewn perthynas â’r penderfyniad dan sylw
• bod PecynUK wedi methu â thalu’r swm cywir i’r awdurdod perthnasol o dan reoliad 76

Mae sail yr apêl mewn perthynas â’r penderfyniad y cyfeirir ato yn rheoliad 105(4)(b) fel a ganlyn: 

• bod penderfyniad PecynUK ar sut i ddosbarthu’r cyfanswm sydd ar gael i’w rannu rhwng awdurdodau perthnasol yn anghywir.

Mae sail yr apêl mewn perthynas â’r penderfyniad y cyfeirir ato yn rheoliad 105(4)(c) fel a ganlyn

• bod yr wybodaeth a ddarparwyd gan yr awdurdod perthnasol i ategu’r gŵyn yn berthnasol i’r penderfyniad i gadarnhau’r gŵyn

Hawliau Apelio  

 Dim ond ar ôl i weithdrefn cwyno PecynUK mewn perthynas â’r penderfyniad neu’r hysbysiad perthnasol yr apeliwyd yn eu herbyn gael ei dilyn ac ar ôl cael penderfyniad gan PecynUK ynghylch y gŵyn a wnaed y caniateir apelio yn erbyn penderfyniad neu hysbysiad a wnaed gan PecynUK o dan baragraff (1), (2) neu 4(a) neu (b) o reoliad 105 ^{[footnote 2]}.Os daw gwybodaeth neu ddata newydd ar gael sy’n berthnasol i’r gŵyn wreiddiol a wnaed, gellir gofyn i’r gŵyn honno gael ei hailystyried.

Dim ond ar ôl i’r hysbysiad o’r penderfyniad y mae’r apêl yn ymwneud ag ef wedi’i anfon gan PecynUK y caniateir cyflwyno apêl o dan reoliad 104. 

Pryd i apelio 

Rhaid i apêl gael ei chyflwyno o fewn yr amserlenni a ganlyn:   

• os yw’r apêl yn cael ei gwneud o dan reoliad 104, rhaid ei gwneud o fewn 2 fis ar ôl y dyddiad y cafodd hysbysiad o’r penderfyniad ei anfon gan PecynUK (oni bai bod apêl yn cael ei wneud i Weinidogion yr Alban sydd ar unrhyw bryd yn cael caniatáu i hysbysiad o apêl gael ei roi ar ôl y dyddiad dod i ben o 2 fis)
• os yw’r apêl yn cael ei gwneud o dan reoliad 105, rhaid ei gwneud o fewn 2 fis ar ôl y dyddiad y mae unrhyw benderfyniad o dan weithdrefn gwyno PecynUK wedi’i ddisbyddu

Ble i gyflwyno’ch apêl  

Gan ddibynnu ar leoliad apelydd yn y Deyrnas Unedig, dylai’r apêl gael ei chyflwyno i’r corff apelio priodol fel a ganlyn (gweler rheoliad 103):

• yng Nghymru a Lloegr, tribiwnlys yn y Siambr Reoleiddio Gyffredinol fydd yn delio ag apelau. Ewch i Chwilio am lys neu dribiwnlys ac edrychwch ar y Tribiwnlys Haen Gyntaf
• yn yr Alban, Gweinidogion yr Alban fydd yn delio ag apêl o dan reoliad 104. Y siryf fydd yn delio ag apêl o dan reoliad 105
• yng Ngogledd Iwerddon, y Comisiwn Apelau Cynllunio fydd yn delio ag apelau

 Beth sy’n digwydd nesaf 

Bydd y corff apelio priodol uchod yn cysylltu ynglŷn â’r camau nesaf ar ôl i’r apêl gael ei chyflwyno. 

I gael rhagor o wybodaeth am y broses apelio, gweler y rheoliadau a ganlyn: 

• Rheoliad 106: Gweithdrefn apelau
• Rheoliad 107: Statws wrth ddisgwyl apêl 
• Rheoliad 108: Penderfynu ar apelau 

Y ddeddfwriaeth a’r rheolau 

Gallwch weld y rheoliadau yn Rheoliadau Rhwymedigaethau Cyfrifoldeb Cynhyrchwyr (Pecynwaith a Gwastraff Pecynwaith) 2024. 

Gallwch ddarllen y rheolau ar sut y bydd eich achos yn cael ei drafod yn y Deyrnas Unedig: 

• Tribiwnlys Haen Gyntaf: Rheolau gweithdrefn y Siambr Reoleiddio Gyffredinol 2009
• Gwasanaeth Llysoedd a Thribiwnlys yr Alban: Rheolau Ceisiadau Diannod, Ceisiadau Statudol ac Apelau 1999
• Rheolau Gogledd Iwerddon: cysylltwch â’r Comisiwn Apelau Cynllunio

1. Cwmni daliannol yw lle ceir cofrestriad grŵp ↩

2. Ni chaniateir cyflwyno unrhyw apêl o dan baragraff (1), (2) neu (4)(a) neu (b) o’r rheoliad hwn oni bai bod yr apelydd wedi cyflwyno cwyn yn gyntaf o dan weithdrefn gwyno PecynUK am y penderfyniad neu’r hysbysiad y mae’n apelio yn ei erbyn. ↩