Skip to main content

Gweithdrefn gwyno

Mae'r canllawiau hyn yn esboniosut rydym yn delio â chwynion gan gwsmeriaid ynghylch ein hymddygiad neu ein safonau gwasanaeth.

Diben a chwmpas

Mae’r ddogfen hon yn esbonio sut rydym yn rheoli cwynion gan gwsmeriaid am ein hymddygiad neu safonau gwasanaeth.

Rôl y Comisiwn yw sicrhau bod elusennau’n atebol, yn cael eu rhedeg yn dda ac yn bodloni eu rhwymedigaethau cyfreithiol. Gallwch ddarllen mwy am y Comisiwn ar ein Tudalen ‘Amdanom Ni’.

Gwneud cwyn

Mae’r Comisiwn yn diffinio cwyn fel:

“Unrhyw fynegiant llafar neu ysgrifenedig o anfodlonrwydd ynghylch safon y gwasanaeth a gafwyd wrth ymgysylltu â’r Comisiwn neu yn ystod ein gwaith rheoleiddio ehangach, na chafodd ei ddatrys gan staff ar ôl i fater gael ei amlygu”

Rydym am i’n cwsmeriaid gael profiad cadarnhaol wrth ddefnyddio ein gwasanaeth. Os ydych yn anfodlon ar ein hymddygiad neu safon ein gwasanaeth, hoffem i chi roi gwybod i ni.

Yn aml, gellir datrys mater yn anffurfiol yn y pwynt cyswllt cyntaf. Rydym yn eich annog i gysylltu â’r rheolwr achos rydych wedi bod yn delio ag ef yn y lle cyntaf i weld a ellir datrys y materion yn brydlon.

Pryd i ddefnyddio’r broses hon

Os nad yw’r gwasanaeth a gewch yn cyrraedd ein safon uchel arferol, ac nad ydym wedi gallu datrys y mater yn anffurfiol, gallwch gysylltu â’r Tîm Cysylltiadau Cwsmeriaid i gyflwyno cwyn am y gwasanaeth. Gallwch gwyno wrth y Tîm Cysylltiadau Cwsmeriaid os ydych yn anfodlon:

  • ar y modd y cyflawnodd y Comisiwn ei waith mewn achos penodol

  • y ffordd y cawsoch eich trin

  • pa mor hir y mae wedi cymryd i ni wneud rhywbeth

Ble na allwn ni helpu

Ni all y Tîm Cysylltiadau Cwsmeriaid ymchwilio i gŵynion ynghylch:

  • canfyddiadau neu benderfyniadau’r Comisiwn wrth gyflawni ei swyddogaethau rheoleiddiol

  • y defnydd o’n pwerau rheoleiddiol. Darllen ein canllawiau am ragor o wybodaeth ar beth i’w wneud os ydych chi’n ystyried bod y penderfyniad yn anghywir

  • cyfraith neu bolisi elusennau

Ni all y tîm ystyried cwynion sydd:

  • wedi cael eu hystyried yn flaenorol gan y Comisiwn

  • wedi cael eu hymchwilio eisoes neu sy’n cael eu hymchwilio ar hyn o bryd, gan Ombwdsmon y Senedd a’r Gwasanaeth Iechyd

  • yn destun, neu wedi bod yn destun, achos cyfreithiol

Nid gwasanaeth ymdrin â chwynion yw’r Comisiwn. Nid ein rôl ni yw datrys cwynion ynghylch safon gwasanaeth elusen mewn achos unigol. Darllen ein canllawiau am ragor o wybodaeth ynghylch ein rôl.

Sut i wneud cwyn

Gall unrhyw un sydd wedi dod i gysylltiad â ni wneud cwyn am ein hymddygiad neu ein safon gwasanaeth. Dylid gwneud cwynion cyn gynted â phosibl ac erbyn dim hwyrach na thri mis ar ôl dyddiad y digwyddiad sy’n achosi’r gŵyn. Gallai oedi effeithio ar ein gallu i ystyried eich cwyn, ac efallai y byddwn yn penderfynu peidio ag ymchwilio i’ch pryderon.

Os yw rhywun yn gwneud cwyn ar eich rhan, mae angen eich caniatâd arnom i godi a thrafod y gwyn.

Os oes gennych gŵyn, llenwch ein ffurflen ar-lein.

Cwyn - Comisiwn Elusennau Cymru a Lloegr

Os ydych yn cael anhawster defnyddio ein ffurflen gwyno ar-lein, ffoniwch ni ar 0300 0669197 lle gall aelod o’r tîm eich helpu. Gallwch ysgrifennu at:

Charity Commission
PO Box 211 
Bootle 
L20 7YX

Os byddwch yn ysgrifennu atom, mae’n bwysig eich bod yn dweud wrthym:

  • beth rydych chi’n meddwl a aeth o’i le

  • sut y dylem ei unioni

  • yr effaith arnoch chi

Beth sy’n digwydd pan fyddwch chi’n cwyno

Byddwn bob amser yn ymchwilio i’ch cwyn yn deg ac yn:

  • cydnabod eich cwyn ac anelu at ymateb yn llawn o fewn 30 diwrnod gwaith, ond os yw’r broblem yn gymhleth ac angen mwy o amser arnom, byddwn yn rhoi gwybod i chi

  • egluro’n glir pam rydym wedi dod i’n casgliad

  • rhoi gwybod i chi os ydym wedi gwneud camgymeriad, egluro beth ddigwyddodd a chywiro’r sefyllfa cyn gynted â phosibl

  • rhoi gwybod i chi am welliannau y dylid eu gwneud i’n prosesau

Sut i fynd â’ch cwyn ymhellach

Os nad ydych yn fodlon ar y ffordd y mae’r Tîm Cysylltiadau Cwsmeriaid wedi ymdrin â’ch cwyn, anfonwch e-bost at y Rheolwr Cysylltiadau Cwsmeriaid o fewn mis i customerrelations@charitycommission.gov.uk. Yna bydd y Rheolwr Cysylltiadau Cwsmeriaid yn adolygu’r ymateb i’r gŵyn a gawsoch i sicrhau:

  • bod ein hymateb a’r penderfyniad a wnaethom yn deg

  • ein bod wedi ymdrin â’r holl faterion yn eich cwyn

  • ein bod wedi cywiro unrhyw ddiffygion yn y gwasanaeth

  • ein bod wedi egluro’r canlyniad i chi yn glir

Os ydych chi’n dal yn anfodlon ar ôl hyn, gallwch ofyn i’ch AS fynd â’ch cwyn i’r Ombwdsmon y Senedd a’r Gwasanaeth Iechyd (PHSO). Mae’r Ombwdsmon yn annibynnol ar bob corff llywodraethol a bydd yn adolygu eich cwyn.

Ni all y PHSO wrthdroi penderfyniadau rheoleiddiol a wnaed gan y Comisiwn; mater i’r llysoedd yw hynny. Ei rôl yw ymchwilio i gŵynion ynghylch camweinyddu, a allai gynnwys y modd y gwnaed penderfyniad, ond nid disodli penderfyniad y Comisiwn ei hun.

Dywedwch wrthym beth a wnaethom yn dda

Mae’n ein helpu i wybod pryd rydym wedi gwneud yn dda, a phryd rydym yn rhagori ar eich disgwyliadau o ran gwasanaeth cwsmeriaid.

Os yw eich adborth yn ymwneud ag unigolyn yn y Comisiwn, ceisiwch ddarparu’r enw fel y gallwn sicrhau bod yr adborth yn cael ei rannu gyda’r person hwnnw.

Os oes gennych ganmoliaeth, cysylltwch â’r rheolwr achos rydych wedi bod yn delio ag ef i roi’r adborth. Fel arall, gallwch gysylltu â ni drwy’r post:

Charity Commission
PO Box 211
Bootle 
L20 7YX

Cwynion nad ydynt yn dod o dan y polisi hwn

Ni all y Tîm Cysylltiadau Cwsmeriaid ymdrin â chwynion ynghylch ymateb Rhyddid Gwybodaeth. Mae’r rhain yn cael eu trin o dan ein proses FoI. Dysgu rhagor ynghylch ceisiadau Rhyddid Gwybodaeth (FOI).

Cynnwys