Arglwydd Raglaw Ei Fawrhydi ym Morgannwg Ganol yn anrhydeddu deuddeg o bobl
Mae cynrychiolydd y Brenin dros Forgannwg Ganol wedi talu teyrnged i’r Lluoedd Cadetiaid am fod yn sefydliad ‘gwirioneddol ryfeddol’.
Lord-Lieutenant of Mid Glamorgan Awards. Copyright: RFCA for Wales.
Roedd Arglwydd Raglaw Morgannwg Ganol Ei Fawrhydi, yr Athro Peter Vaughan QPM CStJ, yn siarad yn ei seremoni wobrwyo flynyddol a gynhelir i ddathlu cyflawnwyr uchel o’r cadetiaid a’r lluoedd wrth gefn.
Canmolodd ymdrechion deuddeg o bobl, gan gynnwys wyth o gadetiaid ifanc o bob rhan o Forgannwg Ganol, yn ei seremoni wobrwyo a gynhaliwyd yng Nghanolfan Wrth Gefn y Fyddin ym Mhontypridd ddydd Iau, 26 Ionawr 2023.
Dywedodd fod y Lluoedd Cadetiaid, sy’n cynnig cymysgedd o hyfforddiant milwrol, gwaith ieuenctid, cymwysterau sifil a gwaith cymunedol wedi helpu i ddatblygu pobl ifanc i fod yn barod i gymryd eu lle mewn cymdeithas.
“Ni fyddai’r Lluoedd Cadetiaid yn bodoli oni bai am ymroddiad ac ymrwymiad gwych y swyddogion a’r oedolion sy’n wirfoddolwyr sy’n rhoi o’u hamser rhydd er mwyn helpu i redeg y sefydliad”, dywedodd yr Athro Vaughan.
Cafodd y Cadét Abl Brandon Jones o Gorfflu Cadetiaid y Môr y Rhondda; y Cadét Abl Anna-Maria Petter o Gorfflu Cadetiaid y Môr Porthcawl; y Cadét Sarjant Hedfan Scott Jones o Gadetiaid Awyr RAF Rhif 3 y Welsh Wing; y Cadét Sarjant Hedfan Emily Richards o Gadetiaid Awyr RAF Rhif 1 y Welsh Wing; a’r Corporal Gadét Casey Garland o Luoedd Cadetiaid Cyfun Caerdydd a’r Fro, eu penodi fel Cadetiaid yr Arglwydd Raglaw ar gyfer Morgannwg Ganol yn 2023.
Roedd Brandon, 16 oed, o Donypandy ac sy’n gobeithio ymuno â’r Llynges Frenhinol, yn falch iawn o fod yn rhan o osgordd er anrhydedd y cadetiaid yn ystod ymweliad cyntaf y Brenin â Chaerdydd.
Mae Anna-Maria, 16 oed, o Ben-y-bont ar Ogwr, sy’n mynychu Coleg Caerdydd a’r Fro, yn gerddor brwd sy’n gobeithio astudio perfformio cerddoriaeth yn y dyfodol. Mae hi hefyd wrth ei bodd yn rhwyfo a’i llwyddiant mwyaf yn y cadetiaid oedd treulio wythnos ar fwrdd TS Royalist y llynedd.
Mae Scott, 17 oed, sy’n mynychu Ysgol Gyfun Bryntirion ym Mhen-y-bont ar Ogwr, wedi cael ei ddisgrifio fel un sydd â ‘sgiliau arwain rhagorol’ ac fe enillodd Wobr Cadét Iau y Flwyddyn yn ei 12 mis cyntaf. Mae’n goruchwylio’r Hyfforddiant i’r Recriwtiaid Hedfan sydd bellach yn cynnwys dros ugain o gadetiaid. Mae’n gobeithio bod yn beiriannydd naill ai yn yr Awyrlu Brenhinol neu gyda British Airways.
Mae Emily, 17 oed, o Ferthyr, hefyd yn mynychu Coleg Caerdydd a’r Fro, ac mae’n gobeithio bod yn beiriannydd yn sector awyrofod y fyddin. Mae hi wedi cyflawni cryn dipyn gyda’r cadetiaid yn barod yn cynnwys hedfan mewn hofrennydd Merlin ac ennill tystysgrif am wasanaeth da gan Gomodor yr Awyrlu.
Mae Casey, 17 oed, o Aberdâr, yn mynychu Coleg Caerdydd a’r Fro. Mae’n teithio 50 milltir bob wythnos ar drafnidiaeth gyhoeddus i fynd i’r cadetiaid ac yn dweud mai ei llwyddiant mwyaf hyd yma oedd cynrychioli’r cadetiaid adeg ymweliad cyntaf y Brenin â Chastell Caerdydd.
Dewiswyd y pump ar gyfer rôl anrhydeddus cadetiaid yr Arglwydd Raglaw ar ôl cael eu henwebu gan arweinwyr grwpiau cadetiaid a Chymdeithas y Lluoedd Wrth Gefn a’r Cadetiaid yng Nghymru.
Byddant yn dilyn yn ôl-traed Y Cadét David Morgan o Gorfflu Cadetiaid Môr Porthcawl, Y Corporal Gadét Nyah Pope o Lu Cadetiaid y Fyddin Dyfed a Morgannwg, y Cadét Sarjant Hedfan Garyn Kiff o Gadetiaid Awyr RAF Rhif 1 y Welsh Wing, a’r Cadét Sarjant Hedfan Corey Luke o Gadetiaid Awyr RAF Rhif 3 y Welsh Wing a gafodd Dystysgrif a Bathodyn Arglwydd Raglaw Morgannwg Ganol am eu gwaith fel cynrychiolwyr 2022.
Mae rôl cadét yr Arglwydd Raglaw yn cynnwys mynychu digwyddiadau swyddogol gyda’r Arglwydd Raglaw, sy’n gweithredu fel cynrychiolydd y Brenin mewn nifer o ddigwyddiadau swyddogol, gan gynnwys digwyddiadau Cofio, gorymdeithiau ac ymweliadau Brenhinol.
Cafodd tri oedolyn eu cydnabod hefyd am eu gwasanaeth rhagorol a’u hymroddiad i ddyletswydd - a dyfarnwyd Tystysgrif Teilyngdod yr Arglwydd Raglaw iddyn nhw.
Dyma’r tri - yr Hyfforddwr Sifilaidd, Michelle Sussex, o Gadetiaid Awyr RAF Cymru Rhif 1 y Welsh Wing, y Sarjant Stephen Hughes o 3ydd Bataliwn y Cymry Brenhinol, a’r Is-gorporal Dros Dro Rebecca Comer o Gorfflu Hyfforddiant Swyddogion Prifysgolion Cymru.
Ymunodd Michelle, sy’n byw ym Merthyr Tudful, â phwyllgor sifilaidd 415 Sgwadron Merthyr Tudful ar ôl i’w mab ymuno fel cadét ac o fewn ychydig o flynyddoedd fe’i hanogwyd i ddod yn Hyfforddwr Sifilaidd. Ar hyn o bryd mae’n ddirprwy hedfan datgysylltiedig – yn aelod hanfodol ac eithriadol o’r tîm.
Mae Rebecca o’r Llu Wrth Gefn, yn byw ym Mhen-y-bont ar Ogwr ac roedd hi’n swyddog cadét gydag UOTC Cymru yn ystod ei chyfnod yn y brifysgol. Ar ôl gadael y brifysgol, fel rhan o UOTC Cymru ymunodd â’r Rheolaeth Filwrol ar y Cyd yng Nghymru i gefnogi Ymgyrch Rescript yn ystod y pandemig, lle bu’n gweithio fel rhan o dîm yr ystafell gweithrediadau. Y tu allan i’w gwaith yn y lluoedd wrth gefn, mae Rebecca wedi gwneud cais i ymuno â’r heddlu.
Mae Stephen o’r Llu Wrth Gefn, yn byw ym Mhontypridd ac yn gweithio fel recriwtiwr yn 3ydd Bataliwn y Cymry Brenhinol ac mae wedi rhagori’n gyson dros nifer o flynyddoedd ar y cwotâu recriwtio. O ganlyniad i’r llwyddiant hwn, mae’n cael ei gyflogi dri diwrnod yr wythnos erbyn hyn. Mae’n cadw mewn cysylltiad â recriwtiaid yn ei amser ei hun i sicrhau eu bod yn cael y wybodaeth ddiweddaraf ac mae’n cael boddhad mawr o helpu pobl eraill i ddod yn aelodau o’r Lluoedd Arfog.
Mae bron i 5,000 o gadetiaid yng Nghymru sy’n ennill sgiliau a chymwysterau trwy weithio gydag elusennau a chymunedau lleol yn ogystal â chymryd rhan mewn amrywiaeth o weithgareddau ymarferol. Mae maes llafur y cadetiaid yn cael ei gyflwyno gan 1,500 o hyfforddwyr gwirfoddol a chynorthwywyr sifil, sy’n rhoi o’u hamser rhydd gyda’r nos yn ystod yr wythnos ac ar benwythnosau.
Roedd tua 80 o bobl yn bresennol yn y seremoni wobrwyo a gafodd ei threfnu gan Gymdeithas Cadetiaid a Lluoedd Wrth Gefn Cymru (RFCA) – sefydliad sydd wedi cefnogi’r Lluoedd Arfog am dros 100 mlynedd.