Deg o bobl yn cael eu cydnabod gan Arglwydd Raglaw Clwyd Ei Fawrhydi
Mae ymdrechion deg o bobl o bob rhan o Glwyd, gan gynnwys wyth cadét ifanc, wedi cael eu cydnabod gan gynrychiolydd y Brenin dros y sir.
Lord-Lieutenant of Clwyd Awards. Copyright: RFCA for Wales
Mae’r Rhingyll Cadét Owen Brumby o Lu Cadetiaid Cyfun Ysgol Santes Ffraid, y Corporal Gadét Alun Hughes o Adain Gymreig Rhif 2 Cadetiaid Awyr yr RAF a’r Rhingyll Cadét Hedfan Lewis Hughes o Adain Gymreig Rhif 2 Cadetiaid Awyr yr RAF wedi cael eu penodi’n gadetiaid Arglwydd Raglaw Clwyd ar gyfer 2023.
Penododd Arglwydd Raglaw Clwyd, Henry George Fetherstonhaugh OBE FRAgS y tri mewn seremoni wobrwyo ym Marics Hightown, Wrecsam, ddydd Iau 30 Mawrth.
Mae’r rôl sy’n para am flwyddyn yn cynnwys mynychu nifer o ddigwyddiadau swyddogol fel digwyddiadau Coffa, ymweliadau Brenhinol a gorymdeithiau gyda’r Arglwydd Raglaw.
Daeth oddeutu 70 o bobl i’r digwyddiad i nodi’r penodiadau newydd. Nawr, bydd gan y cadetiaid gyfrifoldeb o gynrychioli eu cyfoedion a’u sefydliadau mewn achlysuron lleol a chenedlaethol.
Owen, o’r Rhyl, oedd y dirprwy ar dîm mawreddog Patrôl Cambrian a hyfforddiant anturus yw ei hoff weithgaredd. Mae’n gobeithio dod yn beiriannydd awyrofod neu’n beiriannydd cerbydau modur. Mae Alun, o Ddyserth, sy’n mynychu Coleg Llandrillo, yn aelod caredig a chefnogol o Sgwadron 2193 (Prestatyn). Un o’i lwyddiannau mwyaf nodedig yw cael statws corporal a chael yr hyder a’r gallu i arwain cadetiaid mewn dril a chwblhau heriau tîm.
Mae Lewis, o Wrecsam, yn mynychu Coleg Cambria. Ymunodd â Sgwadron 1251 (Berwyn) yn 2017 a dros y pum mlynedd diwethaf mae wedi bod yn fodel rôl gwych i bobl ifanc a Chadetiaid Awyr yr RAF yng Ngogledd Cymru. Ei uchelgais yw ymuno â’r RAF fel peilot ac mae’n gobeithio hedfan awyrennau aml-beiriant.
Bydd y tri yn dilyn ôl traed y Rhingyll Cadét Isabella Jones a’r Rhingyll Cadét Ciara Venables o Lu Cadetiaid y Fyddin Clwyd a Gwynedd; y Rhingyll Cadét Maddie Bunn a’r Rhingyll Cadét Bethan Shutt o Lu Cadetiaid Cyfun Ysgol Santes Ffraid a’r Swyddog Cadét â Gwarant Kristian Harrison o Adain Gymreig Rhif 2 Cadetiaid Awyr yr RAF, a gafodd Dystysgrif a Bathodyn yr Arglwydd Raglaw am fod yn gynrychiolwyr 2022.
Yn y seremoni a oedd yn cydnabod y rheini sydd wedi cyflawni’n uchel ymysg y cadetiaid a’r lluoedd wrth gefn, cafodd dau oedolyn eu cydnabod am eu gwasanaeth rhagorol a’u hymroddiad i ddyletswydd, a dyfarnwyd Tystysgrif Teilyngdod yr Arglwydd Raglaw iddyn nhw. Deborah Restall o Gorfflu Cadetiaid Môr Cei Connah a’r Prif Is-Swyddog Keith McDermott o Gorfflu Cadetiaid Môr y Rhyl oedd y ddau.
Mae bron i 5,000 o gadetiaid yng Nghymru sy’n ennill sgiliau a chymwysterau trwy weithio gydag elusennau a chymunedau lleol yn ogystal â chymryd rhan mewn amrywiaeth o weithgareddau ymarferol. Mae maes llafur y cadetiaid yn cael ei gyflwyno gan 1,500 o hyfforddwyr gwirfoddol a chynorthwywyr sifil, sy’n rhoi o’u hamser rhydd gyda’r nos yn ystod yr wythnos ac ar benwythnosau.
Cafodd y digwyddiad gwobrwyo ei drefnu gan Gymdeithas Cadetiaid a Lluoedd Wrth Gefn Cymru (RFCA) – sefydliad sydd wedi cefnogi’r Lluoedd Arfog ers dros 100 mlynedd.