එක්සත් රාජධානියේදී නීති විරෝධී ශ්‍රී ලාංකික සේවකයින් අත්අඩංගුවට
පසුගිය සතියේදී එංගලන්තයේ බ්ලැක්පුල් හිදී එක්සත් රාජධානියේ ස්වදේශ අමාත්‍යංශයේ ආගමන බලාත්මක නිලධාරීන් කරන ලද මෙහෙයුමක දී ආපන ශාලා දෙකක සේවය කරමින් සිටි නීති විරෝධී සංක්‍රමණික ශ්‍රී ලාංකික සේවකයින් 5 දෙනෙකු අත්අඩංගුවට ගෙන ඇත.
Sri Lankan illegal workers arrested in the UK
අත්අඩංගුවට ගත් පිරිස අතර වීසා කාලය ඉක්මවා වැඩ කරමින් සිටි වයස අවුරුදු 21 හා 22 අතර වූ ශ්‍රී ලාංකිකයින් දෙදෙනෙක්ද වුහ. එ සියලු දෙනාම එක්සත් රාජධානියෙන් පිටමන් කිරීම සදහා රඳවාගෙන ඇත. නීති විරෝධී සංක්‍රමණිකයන් සේවයේ යෙදවීම සම්බන්ධයෙන් එම ව්‍යාපාරික ආයතන දෙකට සිවිල් නීති සංග්‍රහය යටතේ නොතිසි නිකුත් කිරීමට නියමිතය. සේවයේ යෙදවීමට පෙර අවශ්‍ය කරන නීතිමය පරීක්ෂාවන් කළ බවට සාක්ෂි ඉදිරිපත් කිරීමට සේව්‍යයා අපොහොසත් වුව හොත් සේවයේ යෙදවූ සේවකයෙක් වෙනුවෙන් පවුන් 10,000 ක දඩයක් නියම කල හැකිය. ස්වදේශ කටයුතු අමාත්‍යංශය ආගමන බලාත්මක නිලධාරී කොලින් බර්මින්ටන් මෙසේ ද පැවසිය.
නීති විරෝධී ලෙස සේවයේ යෙදවීමෙන් නීති විරෝධී සංක්‍රමණය දිරි ගැන්වේ. අපි මෙවැනි මෙහෙයුම් කරන්නේ එ නිසායි. ඔබ ව්‍යාපාරිකයෙක් නම් ඔබගේ කාර්ය මණ්ඩලය ගැන නිසි පරිදි පරික්ෂා කළ යුතුයි. නැතිනම් ඔබට විශාල දඩ මුදලක් ගෙවීමට සිදු වනු ඇත. කාර්ය මණ්ඩල ගැන කල යුතු නිසි පරික්ෂාව කුමක් දැයි ව්‍යාපාරිකයින්ට පැහැදිලි කර දීමට අප කැමතියි. එහෙත් නීති කඩකරන්නන්ට එ වෙනුවෙන් දැඩි දඩුවමකට මුහුණ දීමට සිදුවිය හැකි බව දැන සිටිය යුතුයි.
නිත්‍යානුකුලව සේවයේ යොදවා ගැනීමේදී සිදුවන ප්‍රමාද ඉවත් කරමින් නීති විරෝධී සංක්‍රමණිකයින් සේවයේ යොදවන ව්‍යාපාරවලට සිවිල් නීති සංග්‍රහය යටතේ දැඩි දඩුවම් පැමිණවීමේ ක්‍රියා පටිපාටිය පසුගිය සතියේදී රජයෙන් ප්‍රකාශයට පත්කෙරිණ. මෙම යෝජනා නීති විරෝධී සංක්‍රමණිකයන්ට එක්සත් රාජධානියේ ජිවත් වීම හා වැඩකිරීම වඩාත් දුෂ්කර කරවීමේ හා ඔවුන් සූරා කන වැරදි කරන සේව්‍යයන්ට දැඩි දඩුවම් පැමිණවීමේ අරමුණින් සකස් කළ රජයේ සැලැස්මේ කොටසකි. ඉන් සංක්‍රමණ ප්‍රතිපත්තිය, සෞඛ්‍ය සේවය, නිවාස පහසුකම් හා රජයේ සියලු සේවාවන් සැපයීමේ සුභසාධන පද්ධතියට ගැලපෙන ආකාරයට හැඩ ගැස්වීමද අරමුණු කෙරේ.
නීති විරෝධී සංක්‍රමණිකයන් සේවයේ යොදවන හාම්පුතුන්ට එක සේවකයෙක් වෙනුවෙන් උපරිමය පවුන් 20,000(ආසන්න වශයෙන් ශ්‍රී ලංකා රුපියල් දශ ලක්ෂ 3.9 ) දක්වා, නිතිය නැවත නැවතත් කඩ කරන හාම්පුතුන් සදහා දඩ නියම කිරීම ඇතුළත්ව සිවිල් නීති පද්ධතිය වඩාත් දැඩි කිරීමට මෙම යෝජනා වලින් අදහස් කෙරේ.
මෙම වසරේ ඉදිරියේදී හදුන්වාදෙන සංක්‍රමණික පනතට මෙම යෝජනා ඇතුළත් වන අතර ඉන් සංක්‍රමණික නීති හා බලාත්මක කිරීම වඩාත් දැඩි කොට එක්සත් රාජධානියේ මහජන සේවාවන් විදේශිකයින් විසින් අයුතු ලෙස භාවිතා කිරීම නතර කිරීම ද අදහස් කෙරේ.
මෙම මාසය මුල දී සිටින්ග්බොර්න් හි ගරාජයක වැඩ කරමින් සිටි ශ්‍රී ලංකික සේවකයින් 3ක් අත්අඩංගුවට ගෙන එක්සත් රාජධානියෙන් පිටමං කිරීම සදහා සංක්‍රමණික කදවුරක රදවා ගෙන සිටී