Arglwydd Raglaw Ei Fawrhydi Powys yn cydnabod wyth o bobl
Mae ymdrechion wyth o bobl o bob rhan o Bowys wedi cael eu cydnabod gan gynrychiolydd y Brenin ar gyfer y sir.
The Lord-Lieutenant of Powys standing with her Lord-Lieutenant Cadets, recipients of the Certificate of Merit and other awardees. Copyright: RFCA for Wales
Dyfarnwyd Tystysgrif Teilyngdod yr Arglwydd Raglaw i dri pherson gan Mrs Tia Jones i gydnabod eu gwasanaeth eithriadol a’u hymroddiad i ddyletswydd yn y seremoni yng Ngwesty’r Elephant and Castle yn y Drenewydd ddydd Iau, 15 Ionawr.
Hefyd, cydnabuwyd a dathlwyd cyflawniadau dau gadet yr Arglwydd Raglaw yn ystod y digwyddiad a fynychwyd gan oddeutu 60 o bobl.
Bu’r Rhingyll Staff a’r Cadet Harry Agnew o Lu Cadetiaid y Fyddin Gwent a Phowys a’r Swyddog Gwarant a’r Cadet Max Morgan o Adain Rhif 2 Cymru Cadetiaid Awyr yr Awyrlu Brenhinol yn sôn am eu hamser gyda’r cadetiaid wrth y gynulleidfa, gan gynnwys uchafbwyntiau eu rôl dros y 12 mis diwethaf fel cadetiaid i’r Arglwydd Raglaw.
Mae gwaith cadet yr Arglwydd Raglaw yn cynnwys mynychu, yng nghwmni Arglwydd Raglaw Powys yn ei rôl fel cynrychiolydd y Brenin, nifer o ddigwyddiadau swyddogol, gan gynnwys digwyddiadau’r Cofio, ymweliadau Brenhinol a gorymdeithiau.
Cafodd Harry a Max y fraint o gael eu dewis i fod yn gadetiaid i’r Arglwydd Raglaw ar ôl cael eu cyflwyno i’w henwebu gan arweinwyr y grwpiau cadetiaid a Chymdeithas Lluoedd wrth Gefn a Chadetiaid dros Gymru.
Maen nhw wedi dilyn ôl troed Rhingyll Awyr y Cadetiaid Lexie Young o Adain Rhif 2 Cymru Cadetiaid Awyr yr Awyrlu Brenhinol y dyfarnwyd Tystysgrif a Bathodyn yr Arglwydd Lefftenant iddi am fod yn un o gynrychiolwyr 2024/25.
Dyfarnwyd Tystysgrif Teilyngdod yr Arglwydd Raglaw i’r Swyddog Gwarant wrth Gefn Mark Collacott o Frigâd 160 (Cymru), y Rhingyll Staff Ian Corstorphine a’r Swyddog Gwarant Christopher Thompson o Lu Cadetiaid y Fyddin Gwent a Phowys.
Hefyd yn ystod y noson cyflwynwyd gwobr hir-wasanaeth i aelod o Lu Cadetiaid y Fyddin. Cyflwynwyd y 5ed Clesbyn i Fedal Lluoedd y Cadetiaid i’r Capten Paul Jones o Lu Cadetiaid y Fyddin Gwent a Phowys - i ddiolch am 42 mlynedd o wasanaeth.
Dyrchafwyd dau gadet hefyd. Cafodd y Rhingyll Staff a’r Cadet Harry Agnew ei ddyrchafu’n Uwch-ringyll Cwmni y Cadetiaid a dyrchafwyd y Rhingyll a’r Cadet Megan Williams, hefyd o Lu Cadetiaid y Fyddin Gwent a Phowys, yn Rhingyll Staff y Cadetiaid
Mae 4,500 a mwy o gadetiaid yng Nghymru sy’n ennill sgiliau a chymwysterau drwy weithio gyda chymunedau lleol, elusennau a thrwy gymryd rhan mewn amrywiaeth o weithgareddau ymarferol. Mae maes llafur y cadetiaid yn cael ei gyflwyno gan 1,850 o oedolion sy’n gwirfoddoli fel hyfforddwyr a chan gynorthwywyr sifil, sy’n rhoi o’u hamser hamdden gyda’r nos ac ar benwythnosau.
Trefnwyd y seremoni wobrwyo gan Gymdeithas Lluoedd wrth Gefn a Chadetiaid dros Gymru – sefydliad sydd wedi cefnogi’r Lluoedd Arfog ers dros 100 mlynedd.