Chwilio cofnodion profiant am ddogfennau ac ewyllysiau (Cymru a Lloegr)

Gallwch chwilio am gofnod profiant, a elwir hefyd yn ‘grant cynrychiolaeth’, ar gyfer rhywun a fu farw ar ôl 1857.

Mae’r canllaw hwn hefyd ar gael yn Saesneg (English).

Mae profiant yn rhoi hawl gyfreithiol i rywun ddelio ag eiddo ac arian (‘ystad’) unigolyn ymadawedig.

Bydd cofnod profiant newydd ar-lein tua 14 diwrnod ar ôl i brofiant gael ei gyhoeddi.

Mae proses wahanol yn yr Alban a Gogledd Iwerddon.

Gallwch ddefnyddio’r gwasanaeth hwn i wneud y canlynol:

  • chwilio am gofnod profiant yng Nghymru a Lloegr
  • gwirio a yw profiant wedi’i gyhoeddi
  • gwirio’r math o brofiant a gyhoeddwyd
  • archebu copi o gofnod profiant (gan gynnwys ewyllys, os oes un)

Mae pob copi o gofnod profiant a archebir ar-lein yn costio £16.

Dechrau nawr

Cyn i chi ddechrau

Ewyllysiau a chofnodion profiant rhwng 1858 a 1996

Os na allwch ddod o hyd i’r cofnod rydych yn chwilio amdano, gwiriwch y blynyddoedd ar ôl i’r unigolyn farw. Cedwir y cofnodion hyn o dan y flwyddyn y cafodd profiant ei gyhoeddi, yn hytrach na’r flwyddyn marwolaeth.

I ddod o hyd i ewyllys rhywun a fu farw yn y 1990au cynnar, efallai y bydd angen i chi chwilio’r cofnodion ar gyfer 1996 a thu hwnt.

Cofnodion profiant sy’n cynnwys ewyllys

Nid yw pob cofnod profiant yn cynnwys ewyllys. Gwiriwch y math o grant cynrychiolaeth pan fyddwch yn chwilio’r cofnodion.

Mae’r mathau o grant sy’n cynnwys ewyllys yn cynnwys:

  • ‘Profiant’ neu ‘Grant ac Ewyllys’
  • ‘Admon gydag Ewyllys’ neu ‘Grant ac Ewyllys’

Nid yw ‘Gweinyddiad (Admon) neu Grant’ yn cynnwys ewyllys.

Chwilio am gofnod profiant drwy’r post

Lawrlwythwch a llenwch ffurflen PA1S i chwilio am gofnod profiant drwy’r post cyn ei hanfon i’r cyfeiriad ar y ffurflen.

Mae’n costio £16 i wneud chwiliad drwy’r post. Mae hyn yn cynnwys copi o’r cofnod profiant a’r ewyllys (os oes un).

Dylech gael ymateb ymhen 4 wythnos.

Os bu i’r unigolyn farw yn y 6 mis diwethaf

Mae’n bosib nad yw profiant wedi’i gyhoeddi eto. Gallwch ddefnyddio ffurflen PA1S i ofyn i gopi o’r profiant gael ei anfon atoch os caiff ei gyhoeddi yn y 6 mis nesaf. Gelwir hyn yn ‘chwiliad sefydlog’. Mae’n costio £3.

Gallwch ymestyn y chwiliad sefydlog ar ôl 6 mis.

Cynnwys cysylltiedig