Corporate report

Executive summary: Health and Safety Executive Annual Report and Accounts 2024 to 2025 (Welsh translation)

Published 20 November 2025

Applies to England, Scotland and Wales

• Publication for Northern Ireland

Crynodeb gweithredol: Adroddiad blynyddol yr Awdurdod Gweithredol Iechyd a Diogelwch 2024 i 2025

Crynodeb gweithredol yw hwn o adroddiad blynyddol yr Awdurdod Gweithredol Iechyd a Diogelwch (HSE) 2024 i 2025, sy’n cwmpasu’r cyfnod 1 Ebrill 2024 i 31 Mawrth 2025.

Mae HSE yn Gorff Cyhoeddus Anadrannol y Goron a noddir gan yr Adran Gwaith a Phensiynau (DWP).

Perfformiad

Mae’r hyn a wnawn yn bwysig. Mae’n bwysig i bawb ym Mhrydain Fawr. Rydym wedi ymrwymo i amddiffyn pobl a lleoedd a helpu pawb i fyw bywydau mwy diogel ac iachach.

Yn ein 50fed blwyddyn, rydym wedi parhau i sicrhau bod ein hadnoddau sefydliadol yn cael eu defnyddio’n effeithiol, yn ddynamig ac yn unol â’n hamcanion a’n nodau strategol yn ein Cynllun Busnes ar gyfer 2024 i 2025.

Fel rheoleiddiwr cymesur rydym yn chwarae ein rhan yng nghenhadaeth twf y llywodraeth. Rydym yn datblygu polisïau, gan fod yn ystyriol o’r effaith ar dwf lle bynnag y bo modd, gan liniaru neu osgoi unrhyw effeithiau negyddol posibl ar dwf.

Newid sut rydym yn cyflawni ein gwaith

Rydym wedi buddsoddi ymdrech sylweddol i esblygu ein prosesau a’n strwythurau rheoleiddio er mwyn sicrhau ein bod yn parhau i ganolbwyntio ar fynd i’r afael â gweithgareddau risg uwch yn effeithlon ac yn effeithiol.

Eleni rydym wedi cyflawni rhaglenni gwaith sylweddol sy’n adeiladu ar y sylfaen gadarnhaol honno. Mae hyn yn ein helpu i esblygu i fod yn rheoleiddiwr mwy hyblyg, gwydn ac effeithiol, un sy’n parhau i amddiffyn pobl a lleoedd yn effeithiol mewn byd sy’n newid.

Mae trawsnewid yn gweithio orau pan fydd ymrwymiad gan bob lefel o sefydliad.Mae wedi bod yn arbennig o bleserus gweld cymaint o gydweithwyr o bob cwr o’r HSE yn ymwneud â newid sut rydym yn cyflawni ein gwaith. Rydym wedi ymrwymo i wneud gwelliannau pellach.

Yn ystod y flwyddyn rydym wedi datblygu ein system rheoli achosion newydd ymhellach ac wedi cyflwyno’r gwasanaeth arolygu i gydweithwyr, gyda chyflwyniad pellach i fod i ddigwydd yn 2025.

Mae parhau i foderneiddio’r offer y mae ein pobl yn eu defnyddio i gyflawni gwaith hanfodol yn sicrhau ein bod yn cynyddu ein cyrhaeddiad, ein heffaith a’n cynhyrchiant i’r eithaf er mwyn cyflawni ein cenhadaeth.

Cyflawni amcanion ein Cynllun Busnes

Yn ogystal â newidiadau i’n strwythur mewnol, fe wnaethom gyflawni’r rhan fwyaf o amcanion a chyflawniadau ein Cynllun Busnes.

Un cyflawniad arwyddocaol oedd sefydlu’r Rheoleiddiwr Diogelwch Adeiladau (BSR) yn llawn ar gyfer Lloegr. Rydym wedi darparu amrywiaeth o wasanaethau a fydd yn gwella diogelwch trigolion mewn adeiladau risg uwch sydd newydd eu hadeiladu a rhai presennol. Mae hyn yn cynnwys y gyfundrefn reoleiddio ar gyfer adeiladau risg uwch y mae pobl yn byw ynddynt, ardystio asesiadau adeiladau a chyflawni safonau cyson o fewn y proffesiwn rheoli adeiladu. Mae hyn i gyd yn rhan o’n gwaith i helpu i greu amgylchedd adeiledig lle mae pawb yn gymwys ac yn cymryd cyfrifoldeb i sicrhau bod adeiladau o ansawdd uchel a bod pobl yn teimlo’n ddiogel.

Ar 30 Mehefin cyhoeddodd y llywodraeth sefydlu Asiantaeth Weithredol newydd ar gyfer y Weinyddiaeth Tai, Cymunedau a Llywodraeth Leol (MHCLG), gyda’r bwriad y bydd hon yn cymryd drosodd swyddogaethau BSR oddi wrth HSE maes o law.

Mae sefydlu rheoleiddiwr newydd wedi bod yn gymhleth, yn heriol ac yn werth chweil. Mae amddiffyn trigolion a sicrhau na fydd trychineb arall fel Grenfell byth wedi bod yn flaenoriaeth i ni erioed.

Mae’r gwaith i sefydlu BSR wedi cymryd llawer iawn o ymdrech gan bawb yn HSE a gallwn ni fod yn falch o’n cyflawniadau wrth sefydlu rheoleiddiwr newydd o’r dechrau.Mae ein gwaith wedi rhoi diogelwch trigolion wrth wraidd y drefn reoleiddio newydd, ac rydym eisoes yn gwneud adeiladau’n fwy diogel.

Eleni, rydym hefyd wedi parhau i gyflwyno rheoleiddio cadarn ar gemegau o fewn y DU. Gan edrych tua’r dyfodol, mae ein gwyddonwyr arbenigol yn gweithio gyda phartneriaid yn y diwydiant i archwilio’r goblygiadau diogelwch sy’n deillio o dechnolegau newydd a galluogi’r newid i sero net. Roedd hyn yn cynnwys asesu achosion diogelwch, megis ar gyfer ailddefnyddio gosodiadau alltraeth ar gyfer dal a storio carbon. Ar yr un pryd, rydym yn parhau i gydnabod pwysigrwydd cynnal ein rôl wrth reoleiddio peryglon mawr mewn diwydiannau ynni presennol.

Yn ogystal ag ymdrin â’r dyfodol, rhaid i ni hefyd barhau i ymdrin â materion y gorffennol, megis y defnydd hanesyddol o asbestos yn yr amgylchedd adeiledig. Rydym wedi cyflawni amrywiaeth o waith sy’n canolbwyntio ar y rhai sydd fwyaf mewn perygl ac yn codi ymwybyddiaeth ymhlith gweithwyr.

Mae ein ffocws ar leihau afiechyd sy’n gysylltiedig â gwaith yn parhau. Yn y flwyddyn nesaf, bydd ein harolygiadau’n ystyried fwyfwy sut mae cyflogwyr yn atal afiechyd seicolegol yn ogystal ag afiechyd corfforol.

Canolbwyntio ar gydweithio

Rydym yn llais blaenllaw, ond mae’n bwysig cydnabod nad ydym yn gweithredu ar ein pennau ein hunain. Eleni fe wnaethom adnewyddu ein ffocws ar gydweithio â phartneriaid mewn diwydiant, llywodraeth ehangach a rhanddeiliaid eraill. Roedd yn cynnwys ein Uwchgynhadledd Atal gyntaf, a ddaeth ag arweinwyr y diwydiant ynghyd i gydweithio ar atebion ar gyfer atal problemau iechyd sy’n gysylltiedig â gwaith.

Mewn sectorau peryglon mawr, fe wnaethom gyflwyno rhaglen Egwyddorion Arweinyddiaeth Diogelwch Prosesau lwyddiannus lle gwnaethom ymgysylltu â’r diwydiant i nodi meysydd i’w gwella ar y cyd. Mae’n bwysig ein bod yn adeiladu ar y perthnasoedd hyn ac yn eu defnyddio os ydym am barhau i gyflawni ein hamcanion.

Wrth i ni wynebu’r dyfodol, rydym yn hyderus, beth bynnag yw’r newidiadau a wynebwn, y byddwn yn defnyddio ein gwerthoedd a’n harbenigedd ar y cyd. Fel un HSE, byddwn yn ymateb i’r her.

Crynodeb o’n perfformiad yn 2024 i 2025

Mae ein perfformiad yn 2024 i 2025 ar gyfer camau gorfodi yn cynnwys:

• cwblhau 246 o erlyniadau troseddol gyda chyfradd euogfarnu o 96%
• cyhoeddi dros 4,400 o hysbysiadau gan gynnwys tua 3,200 o Hysbysiadau Gwella a 1,200 o hysbysiadau sy’n gwahardd gweithgarwch gwaith sy’n rhoi pobl mewn perygl o farwolaeth neu anaf difrifol
• dros £33 miliwn wedi’i ddyfarnu mewn dirwyon
• cwblhau 86% o ymchwiliadau angheuol o fewn 12 mis i dderbyn sylfaenol, yn erbyn ein targed o 80%

Mae ein perfformiad yn erbyn ein cyflawniadau Cynllun Busnes yn cynnwys:

• cyflawni 100% o’r ymrwymiadau neu’r cyflawniadau cerrig milltir a nodir yn y Cynllun Busnes ar gyfer y flwyddyn
• cwblhau dros 13,200 o arolygiadau, gan gynnwys dros 7,000 o arolygiadau sy’n canolbwyntio’n benodol ar iechyd sy’n gysylltiedig â gwaith a chynnal mwy na 2,700 o arolygiadau ar ôl derbyn cudd-wybodaeth
• sicrhau defnydd diogel a chynaliadwy o blaladdwyr a bioladdwyr drwy gwblhau gwerthusiadau ac awdurdodiadau o fewn yr amserlenni gofynnol ar gyfer 168 o gynhyrchion bioladdwyr a 780 o gynhyrchion amddiffyn planhigion
• rhoi cyngor ac arweiniad ar iechyd a diogelwch drwy gydol y flwyddyn, ymwelwyd â’n gwefan gan 2.6 miliwn o ddefnyddwyr gyda 20.2 miliwn o ymweliadau tudalen a sgôr ‘defnyddioldeb’ o 76%
• derbyn dros 3,700 o geisiadau rhyddid gwybodaeth ac ymateb i 91% o fewn y terfynau amser (yn erbyn targed o 90% neu fwy)
• 77% o ddeiliaid dyletswyddau yn cymryd camau gweithredu o ganlyniad i ymweliad, gyda 91% yn nodi bod canlyniad yr ymweliad yn gymesur â’r risgiau a nodwyd

O ran pobl sy’n gweithio i HSE:

• Roedd 2,986 o aelodau staff cyfwerth ag amser llawn (FTE) ar draws gwahanol leoliadau yn y DU yn gweithio gartref ac yn y swyddfa drwy gydol y flwyddyn
• cynyddodd absenoldeb salwch i 7.2 diwrnod fesul FTE yn erbyn targed o 6.5 diwrnod fesul FTE

Perfformiad ariannol

Cyfanswm y gwariant gweithredu ar gyfer HSE oedd £310 miliwn. Ariannwyd y gwariant hwn yn rhannol drwy incwm o £126 miliwn, gyda gweddill y cyllid yn cael ei ddarparu gan y llywodraeth.

Rydym wedi cyflawni ein hamcanion ar gyfer y flwyddyn, fel y’u mesurwyd gan y cerrig milltir yn ein Cynllun Busnes,o fewn y gyllideb a gytunwyd gennym gyda DWP.

Ein costau dros y 5 mlynedd diwethaf yn ôl prif gategorïau gwariant

	2020/21 £m	2021/22 £m	2022/23 £m	2023/24 £m	2024/25 £m
Costau staff	157	170	170	192	200
Ystadau a llety	36	35	33	35	37
IS/IT	14	12	15	25	19
Dibrisiant	8	7	9	9	10
Costau eraill	30	46	34	52	44
Cyfanswm y gwariant gweithredu (fesul Datganiad o Wariant Net Cynhwysfawr)	245	270	261	313	310

Mae ein gwariant wedi cynyddu dros y cyfnod o 5 mlynedd wrth i’r sefydliad dyfu gyda datblygiad parhaus BSR, ac ychwanegu rheoleiddio cemegol a wnaed yn flaenorol yn yr UE.

Rydym wedi rheoli pwysau chwyddiant yn effeithiol o fewn ein sylfaen costau, gan effeithio’n bennaf ar ein hystâd lle mae gennym 2 gontract Menter Cyllid Preifat (PFI), y ddau yn gysylltiedig â chwyddiant, ynghyd ag arbedion cost ac effeithlonrwydd eraill.

Mae’r gostyngiad mewn gwariant gweithredu yn 2024 i 2025 yn adlewyrchu:

• y dibyniaeth lai ar bartneriaid cyflawni allanol wrth ddatblygu systemau digidol – ac eithrio lle cawsant eu cyfalafu, cynhwyswyd y costau hyn yn TG/IS yn 2023 i 2024
• taliad is am ailfesur y rhwymedigaeth PFI yn dilyn codiad RPI – mae hwn yn daliad damcaniaethol bob blwyddyn sy’n adlewyrchu’r cynnydd chwyddiannol i bob un o 2 gontract PFI HSE – roedd y taliad yn £6.4 miliwn yn 2024 i 2025 ac yn £17.3 miliwn yn 2023 i 2024

Mae costau staff wedi cynyddu yn unol â recriwtio net (mae ein FTEs wedi cynyddu 64 yn ystod y flwyddyn) i gyflawni’r swyddogaethau newydd.

Cynyddodd incwm £21 miliwn i £126 miliwn rhwng 2024 a 2025. O fewn hyn, fe fu gostyngiad sylweddol yn y costau a adenillwyd o erlyniadau. Mae hyn yn dilyn buddsoddiad i gynyddu maint ein tîm cyfreithiol mewnol, sydd wedi lleihau costau asiantau allanol.

Darllen ein Hadroddiad Blynyddol a Chyfrifon 2024 i 2025 yn llawn.