Canllawiau ar awdurdodi cyflasynnau mwg
Cyhoeddwyd 29 Rhagfyr 2020
Yn berthnasol i Loegr, Gogledd Iwerddon a Chymru
© Hawlfraint y Goron 2020
Mae'r cyhoeddiad hwn wedi'i drwyddedu o dan delerau Trwydded Agored y Llywodraeth v3.0 ac eithrio ble nodir yn wahanol. I weld y drwydded hon, ewch i nationalarchives.gov.uk/doc/open-government-licence/version/3 neu ysgrifennwch at y Tîm Polisi Gwybodaeth, Yr Archifau Gwladol, Kew, Llundain TW9 4DU, neu anfonwch e-bost at: psi@nationalarchives.gov.uk.
Lle byddwn wedi nodi unrhyw wybodaeth am hawlfraint trydydd parti, bydd angen i chi gael caniatâd gan ddeiliaid yr hawlfraint dan sylw.
Mae'r cyhoeddiad hwn ar gael yn https://www.gov.uk/government/publications/smoke-flavourings-authorisation-guidance/canllawiau-ar-awdurdodi-cyflasynnau-mwg
Mae cyflasynnau mwg yn cael eu hychwanegu at fwydydd, fel cig neu gaws, i roi blas ‘mwg’ iddyn nhw, fel dewis arall yn lle mygu traddodiadol. Gellir eu hychwanegu hefyd at fwydydd nad ydyn nhw’n cael eu mygu’n draddodiadol, fel cawliau, sawsiau neu ddanteithion (confectionery). Mewn rhai achosion, defnyddir cyflasynnau mwg ar lefelau isel iawn i ychwanegu mymryn o flas penodol yn unig ac nid y blas myglyd llawn.
Mae angen awdurdodi cyflasynnau mwg cyn y gellir eu rhoi ar y farchnad ym Mhrydain Fawr. Mae Rheoliad a gymathwyd 2065/2003 yn amlinellu’r weithdrefn awdurdodi ar gyfer y mathau hyn o gyflasynnau.
Mae cyflasynnau mwg yn cael eu rheoli o dan ddeddfwriaeth wahanol i gyflasynnau eraill, ac felly mae amseriadau gwahanol yn berthnasol ar gyfer y broses dadansoddi risg a gofynion data gwahanol ar gyfer ceisiadau. Mae awdurdodiadau yn benodol i ymgeiswyr.
Cofrestr o gyflasynnau mwg
Mae’r ASB yn cadw cofrestr sy’n adlewyrchu’n gywir statws awdurdodi cyflasynnau mwg fel y’u pennir gan yr awdurdod priodol (gweinidogion) yng Nghymru, Lloegr a’r Alban. Mae’r gofrestr o gynhyrchion crai cyflasynnau mwg yn nodi rhestr o gyflasynnau mwg y caniateir eu defnyddio ym Mhrydain Fawr ac yn cyfeirio at eu telerau awdurdodi.
Awdurdodiadau newydd
I wneud cais i awdurdodi cyflasyn mwg ym Mhrydain Fawr, defnyddiwch ein gwefan ceisiadau cynhyrchion rheoleiddiedig. Gofynnir i chi uwchlwytho’r holl ddogfennau i gefnogi’ch cais, a fydd wedyn yn creu eich coflen. Nid oes rhaid talu ffi i wneud y cais.
Dylai eich cais gynnwys:
- crynodeb cyffredinol o’r cais
- data gweinyddol (rhan 1)
- data technegol (rhan 2)
- data gwenwynegol (rhan 3)
- cyfeiriadau ac adroddiadau (rhan 4)
Canllawiau manwl
- Mae EFSA wedi datblygu canllawiau technegol ar y gofynion ar gyfer coflenni ceisiadau yn flaenorol, ac mae’r canllawiau hyn hefyd yn gymwys ar gyfer coflenni a gyflwynir ym Mhrydain Fawr. Fodd bynnag, dylech ddilyn y rhannau sy’n ymwneud â datblygu coflenni yn unig ac nid y broses ymgeisio. Canllawiau EFSA ar gyflwyno coflen ar gynnyrch crai cyflasyn mwg
- Mae Rheoliad a gymathwyd, Rhif 627/2006 – cynhyrchion mwg yn cwmpasu’r meini prawf ansawdd ar gyfer dulliau dadansoddi dilys ar gyfer samplu, adnabod a nodweddu cynhyrchion mwg crai.
Ceisio cymorth
Os oes gennych chi unrhyw gwestiynau am y weithdrefn awdurdodi neu’r gofynion ymgeisio, gallwch chi gysylltu â ni drwy regulatedproducts@food.gov.uk
Gwneud cais am awdurdodiad
Gallwch nawr ddefnyddio ein gwasanaeth ar-lein i wneud cais i awdurdodi cynnyrch rheoleiddiedig.