PackUK yn Chwilio am Arbenigwr Cadwyn Gwerth i Gadeirio Grŵp Llywio Gweinyddwr y Cynllun
Mae PackUK bellach yn croesawu datganiadau o ddiddordeb (EOI) ar gyfer rôl Cadeirydd Grŵp Llywio Gweinyddwr y Cynllun (SASG).
Mae PackUK, Gweinyddwr y Cynllun ar gyfer Cyfrifoldeb Cynhyrchwyr Estynedig ar gyfer Pecynnu (pEPR), wedi ymrwymo i weithio gydag arbenigwyr o bob rhan o’r gadwyn werth pecynnu i’w arwain yn ei waith.
Mae Grŵp Llywio Gweinyddwr y Cynllun yn chwarae rhan allweddol wrth gefnogi’r berthynas waith agos hon, ac yn dwyn ynghyd weithwyr proffesiynol medrus o bob rhan o’r gadwyn werth pecynnu sy’n angerddol am ailgylchu a chynaliadwyedd amgylcheddol.
Mae’r Grŵp Llywio yn darparu safbwyntiau ac argymhellion gwerthfawr i Bwyllgor Gweithredol Gweinyddwr y Cynllun (SA ExCo) ar swyddogaethau gweithredol Gweinyddwr y Cynllun, gan ei gefnogi i:
- darparu system sy’n creu’r manteision amgylcheddol mwyaf posibl drwy rannu gwybodaeth a chydweithio; a
- sicrhau’r effeithlonrwydd a’r effeithiolrwydd mwyaf posibl i’r system gasglu a phecynnu
Mae’r argymhellion hyn yn chwarae rhan ganolog wrth lunio PackUK wrth iddo dyfu a datblygu. Er nad yw’r grŵp yn ymwneud yn uniongyrchol â gwneud penderfyniadau, mae’n gwasanaethu fel ffynhonnell ddibynadwy o fewnwelediad, sy’n cynnwys aelodau a fydd â chyfoeth o arbenigedd gweithredol ac arbenigedd polisi o amrywiaeth o sefydliadau yn y sector cyhoeddus a’r sector preifat.
Mae datganiadau o ddiddordeb ar gyfer rôl y Cadeirydd bellach ar agor
Rydym wrth ein bodd yn cyhoeddi ein bod bellach yn croesawu datganiadau o ddiddordeb (EOI) ar gyfer penodiad rôl Cadeirydd Grŵp Llywio Gweinyddwr y Cynllun.
Mae’r rôl wirfoddol hon yn cynnig cyfle unigryw i gyfrannu at un o ddiwygiadau amgylcheddol mwyaf arwyddocaol ein hoes: gwneud cyfraniad uniongyrchol at gyflawniad y DU o ddatgarboneiddio a sero net.
Fel Cadeirydd, bydd yr ymgeisydd llwyddiannus yn helpu i arwain cyfeiriad strategol y Grŵp Llywio, gan dynnu ar eu profiad a’u harbenigedd i gefnogi Gweinyddwr y Cynllun i ddarparu system becynnu fwy cynaliadwy ac effeithlon.
Bydd ceisiadau’n cau ar 28 Gorffennaf 2025. Rhaid i ymgeiswyr allu dangos amrywiaeth o sgiliau, profiad a gwybodaeth o bob rhan o’r gadwyn werth, a byddant yn destun proses ymgeisio gystadleuol deg ac agored.
Mae rhagor o wybodaeth am sut i wneud cais i’w gweld isod.
Manylion am y Grŵp Llywio
Yn unol ag arfer gorau rhyngwladol ar gyfer Cynlluniau Cyfrifoldeb Cynhyrchydd Estynedig (EPR), bydd y Grŵp Llywio yn cael ei arwain gan gynhyrchwyr. Dyma gyfansoddiad y seddi ar y Grŵp Llywio:
Bydd y Grŵp Llywio yn cynnwys 10 unigolyn o sefydliadau cynhyrchwyr a chynrychiolwyr cymdeithasau masnach (1 sedd ddynodedig ar gyfer y sector bwyd ac 1 sedd ddynodedig ar gyfer gweithgynhyrchu deunydd pacio) ac 11 aelod arall sy’n cynrychioli Awdurdodau Lleol (ALlau) ym mhob un o’r pedair gwlad, sefydliadau rheoli gwastraff, Sefydliadau Anllywodraethol (NGO) amgylcheddol, cynlluniau cydymffurfio, a chadeirydd annibynnol.
Sut i wneud cais
Mae rhagor o wybodaeth ar gael yn y dogfennau canlynol:
I wneud cais am y rôl wirfoddol hon, dylid dychwelyd eich CV a’ch datganiad ategol i SASteeringgroup@defra.gov.uk erbyn canol dydd ar 28 Gorffennaf 2025, gan nodi’r e-bost fel ‘Cadeirydd Gweinyddwr y Cynllun Grŵp Llywio’ yn y maes pwnc.
Mae’n ofynnol i bob ymgeisydd gyflwyno’r canlynol hefyd:
• Ffurflen Gwybodaeth Amrywiaeth a Gwrthdaro Buddiannau
• CV o ddim mwy na dwy ochr A4 yn amlinellu eich profiad, unrhyw gymwysterau proffesiynol a hanes cyflogaeth.
• Datganiad ategol sy’n dangos sut rydych chi’n bodloni’r meini prawf hanfodol, gan ddarparu enghreifftiau penodol (uchafswm o 750 gair).
Cyflwynwch unrhyw ymholiadau i packuk.governance@defra.gov.uk.