Ն․Մ․ Թագավորի պաշտոնական ծննդյան արարողությունը Երևանում
Հայաստանում Բրիտանական դեսպանությունը տոնում է Նորին Մեծություն Չարլզ III թագավորի ծննդյան 75-րդ տարեդարձը
Հունիսի 19-ին Բրիտանական դեսպանությունը կազմակերպել էր Չարլզ III թագավորի պաշտոնական ծննդյան արարողությունը, որն առաջինն է՝ 2022 թվականի սեպտեմբերի 8-ին իր մոր՝ Եղիսաբեթ II թագուհու մահից հետո Միացյալ Թագավորության գահը ստանձնելուց ի վեր։
Հայաստանում Միացյալ Թագավորության դեսպան Ջոն Գալագերն իր ողջույնի խոսքում ասաց․
Թագավոր Չարլզը Հայաստանի մեծ բարեկամն է։ Նա Հայաստան էր այցելել տասը տարի առաջ, և ես վստահ եմ, որ շատ ջերմ հիշողություններ ունի այստեղ անցկացրած իր ժամանակի և հայկական հանրահայտ հյուրընկալության մասին։
Թագավոր Չարլզը երիտասարդների համար հնարավորությունների ստեղծման, շրջակա միջավայրի և հասարակությունում բազմազանության պաշտպանության և արժևորման եռանդուն ջատագով է։ Այս բոլորը կարևոր ոլորտներ են, որոնցում մենք պետք է առաջընթաց գրանցենք․ոչ միայն Միացյալ Թագավորությունում և Հայաստանում, այլև ողջ աշխարհում։
Հպարտ եմ, որ Բրիտանական դեսպանատունն իր քաղաքական շփումների, ծրագրերի և կարողությունների բարձրացմանը նպաստելու միջոցով աջակցություն է ցուցաբերում Հայաստանին այս և մի շարք այլ ոլորտներում, որոնք կարևոր են այս երկրի կայուն զարգացման համար։
Մենք ցանկանում ենք խորացնել մեր հարաբերությունները Հայաստանի հետ և աջակցել կառավարության հանձնառությանը բարեփոխումներին, թափանցիկությանը և խաղաղությանը։
Միջոցառման պատվավոր հյուրը՝ Հայաստանի փոխվարչապետ Տիգրան Խաչատրյանը, իր ելույթում նշեց․
Նորանկախ Հայաստանի պետականաշինության ճանապարհին Միացյալ Թագավորությունը մշտապես իր աջակցությունն է ցուցաբերել և կարևոր գործընկեր է եղել մեզ համար: Այսօր էլ Միացյալ Թագավորությունն իր ավանդն է բերում մեր երկրում ընթացող ժողովրդավարական բարեփոխումներին, մարդու իրավունքների պաշտպանության ու օրենքի գերակայության ամրապնդմանը: Համոզված եմ, որ այս տարիների ընթացքում կուտակած հարուստ փորձը լայն հնարավորություններ է ընձեռում հայ-բրիտանական համագործակցության ողջ ներուժի իրացման համար՝ նոր խթան հաղորդելով երկկողմ հարաբերություններին, այդ թվում` տնտեսական փոխգործակցությանը։
Տոնակատարությանը միացել էին բազմաթիվ հյուրեր Հայաստանի կառավարությունից և Ազգային Ժողովից, դիվանագիտական կորպուսի անդամներ, գործարար շրջանակների ու քաղաքացիական հասարակության ներկայացուցիչներ։
Միջոցառմանը մատուցվեցին բրիտանական ավանդական ուտեստներ և խմիչքներ, իսկ հյուրերն ունկնդրեցին բրիտանական և հայկական երաժշտության հրաշալի կատարումներ։ Միջազգային ճանաչում ունեցող աճպարար Լուկա Գալոնեն, ով Արքայազն Չարլզի հիմնած «Prince’s Trust» հիմանդրամի շահառու է, հյուրերին զարմացրեց տարատեսակ աճպարարարական հնարքներով։