Disgwylir newidiadau cyntaf i gyfraith cwmnïau'r Deyrnas Unedig ar y 4ydd o Fawrth
Nod Tŷ'r Cwmnïau yw cyflwyno'r set gyntaf o fesurau o dan y Ddeddf Troseddau Economaidd a Thryloywder Corfforaethol ar y 4ydd o Fawrth 2024.
Ein nod yw cyflwyno’r set gyntaf o newidiadau a gyflwynwyd gan y Ddeddf Troseddau Economaidd a Thryloywder Corfforaethol ar y 4ydd o Fawrth. Mae cyflwyno’r newidiadau hyn yn gofyn am is-ddeddfwriaeth felly mae’r dyddiad hwn yn dal i ddibynnu ar amserlenni seneddol. Ni fydd yn digwydd cyn y 4ydd o Fawrth.
Y Ddeddf Troseddau Economaidd a Thryloywder Corfforaethol
Mae’r Ddeddf Troseddau Economaidd a Thryloywder Corfforaethol yn rhoi’r pŵer i Dŷ’r Cwmnïau chwarae rhan fwy arwyddocaol wrth darfu ar droseddau economaidd a chefnogi twf economaidd. Cafodd y ddeddf Gydsyniad Brenhinol ar 26 Hydref 2023.
Beth fydd yn newid
Mae’r set gyntaf o newidiadau a gyflwynwyd gan y Ddeddf Troseddau Economaidd a Thryloywder Corfforaethol yn cynnwys:
- mwy o bwerau i holi gwybodaeth a gofyn am dystiolaeth ategol
- gwiriadau cryfach ar enwau cwmnïau
- rheolau newydd ar gyfer cyfeiriadau swyddfa gofrestredig
- gofyniad i bob cwmni ddarparu cyfeiriad e-bost cofrestredig
- gofyniad i bob cwmni gadarnhau eu bod yn ffurfio’r cwmni at bwrpas cyfreithlon pan fyddant yn corffori, ac i gadarnhau y bydd ei weithgareddau arfaethedig yn y dyfodol yn gyfreithlon ar eu datganiad cadarnhau
- y gallu i anodi’r gofrestr pan fydd gwybodaeth yn ymddangos yn ddryslyd neu’n gamarweiniol
- cymryd camau i lanhau’r gofrestr, gan ddefnyddio paru data i nodi a dileu gwybodaeth anghywir
- rhannu data gydag adrannau eraill y llywodraeth ac asiantaethau gorfodi’r gyfraith
Bydd mesurau eraill o dan y ddeddf, fel gwiriad hunaniaeth, yn cael eu cyflwyno yn hwyrach.
Cael mwy o wybodaeth am newidiadau i gyfraith cwmnïau’r Deyrnas Unedig.
Cofrestrwch ar gyfer cylchlythyrau e-bost o Dŷ’r Cwmnïau.
Darllenwch ein blog am ddiweddariadau ar ddiwygio deddfwriaethol.