Sut i bleidleisio
Pleidleisio drwy'r post
Mae’n rhaid i chi wneud cais am bleidlais bost os ydych chi am wneud cais i bleidleisio drwy’r post, er enghraifft:
- os ydych oddi cartref
- os ydych dramor ac am bleidleisio yng Nghymru, Lloegr neu’r Alban
Nid oes angen i chi roi rheswm oni bai eich bod yn pleidleisio yng Ngogledd Iwerddon.
Y dyddiad cau ar gyfer cofrestru i bleidleisio yn yr Etholiad Cyffredinol
Cofrestrwch erbyn 11:59pm ar 18 Mehefin 2024 er mwyn pleidleisio yn yr Etholiad Cyffredinol ar 4 Gorffennaf 2024.
Os byddwch yn gwneud cais am eich pleidlais bost ar-lein, rhaid i chi wneud cais erbyn 5pm ar 19 Mehefin 2024.
Os byddwch yn gwneud cais am eich pleidlais bost drwy’r post, rhaid i chi sicrhau bod eich cais i bleidleisio drwy’r post yn cyrraedd eich Swyddfa Cofrestru Etholiadol leol erbyn 5pm ar 19 Mehefin 2024.
Os ydych yn byw dramor
Bydd yn cymryd amser i becyn pleidleisio drwy’r post tramor eich cyrraedd ac i chi ddychwelyd y pecyn i’r DU, yn enwedig os yw eich gwasanaethau post lleol yn afreolaidd neu os ydych yn byw ymhell o’r DU.
Mae’r Comisiwn Etholiadol yn cynghori pobl sy’n byw dramor i wneud cais i bleidleisio drwy ddirprwy os yw’n bosibl.
Gwneud cais am bleidlais bost
Gallwch wneud cais am bleidlais bost ar gyfer un o’r canlynol:
- etholiad unigol ar ddyddiad penodol
- cyfnod penodol os ydych am bleidleisio yng Nghymru, Lloegr neu’r Alban
- hyd at dair blynedd
Gallwch wneud y canlynol:
Mae ffurflen wahanol ar gyfer gwneud cais i bleidleisio drwy’r post yng Ngogledd Iwerddon.
Newid i ble caiff eich cerdyn pleidleisio drwy’r post ei anfon
Dylech wneud cais newydd am bleidlais bost os byddwch yn symud tŷ neu os byddwch oddi cartref pan gaiff y bleidlais bost ei hanfon.
Mae ffurflen wahanol ar gyfer Gogledd Iwerddon.
Cwblhau a dychwelyd eich pleidlais bost
Pan fyddwch yn pleidleisio drwy’r post, dylech wneud y canlynol:
- marcio eich pleidlais ar eich papur pleidleisio yn gyfrinachol
- llenwi’r datganiad pleidleisio drwy’r post
- rhoi’r papur pleidleisio a’r datganiad yn yr amlen a ddarperir
- selio’r amlen eich hun
Postiwch eich papur pleidleisio yn ôl cyn gynted â phosibl er mwyn gwneud yn siŵr ei fod yn cael ei gyfrif.
Os bydd yn rhy hwyr i chi bostio eich papur pleidleisio
Ewch â’ch papur pleidleisio i’ch gorsaf bleidleisio leol erbyn 10pm ar ddiwrnod yr etholiad, neu’ch Swyddfa Cofrestru Etholiadol cyn iddi gau.
Os byddwch yn pleidleisio yng Ngogledd Iwerddon, dim ond mewn Swyddfa Cofrestru Etholiadol y gallwch gyflwyno eich pleidlais bost.
Caiff eich pleidlais ei gwrthod os na fyddwch yn rhoi eich pleidlais bost i aelod o’r staff yn yr orsaf bleidleisio neu’r Swyddfa Cofrestru Etholiadol ac yn cwblhau ffurflen. Peidiwch â phostio eich papur pleidleisio drwy flwch llythyrau’r Swyddfa Cofrestru Etholiadol.
Gallwch gyflwyno eich pleidlais bost eich hun a phleidleisiau post hyd at 5 pleidleisiwr arall. Os ydych yn ymgyrchydd gwleidyddol, rhaid i’r 5 pleidleisiwr arall fod yn aelodau o’ch teulu neu’n bobl rydych yn darparu gofal rheolaidd iddynt.
Cael papur pleidleisio newydd yn lle un sydd wedi’i ddifrodi neu ar goll
Mae angen i’ch papur pleidleisio ddangos eich manylion a’ch pleidlais yn glir. Os bydd wedi’i ddifrodi, bydd angen i chi gael un arall.
Gallwch naill ai:
- ofyn i’ch Swyddfa Cofrestru Etholiadol leol bostio papur pleidleisio newydd yn ei le
- casglu papur pleidleisio newydd o’ch Swyddfa Cofrestru Etholiadol leol hyd at 5pm ar ddiwrnod yr etholiad (neu’r diwrnod cyn hynny yng Ngogledd Iwerddon)
Ni chewch bleidleisio mewn gorsaf bleidleisio os byddwch wedi cofrestru i bleidleisio drwy’r post ond bod eich papur pleidleisio ar goll neu wedi’i ddifrodi.