Sut mae'r rhybuddion argyfwng yn gweithio
Mewn argyfwng, bydd mastiau ffonau symudol yn yr ardal oddi amgylch yn darlledu rhybudd. Bydd pob ffôn symudol neu lechen gydweddol o fewn cyrraedd y mastiau hyn yn cael y rhybudd.
Does dim angen bod eich ffôn symudol na'ch llechen wedi'u cysylltu â data symudol neu wifi i gael rhybuddion.
Mae rhybuddion argyfwng yn rhad ac am ddim. Does dim angen i chi lofnodi ar eu cyfer na lawrlwytho ap.
Rhesymau na chewch chi rybuddion
Ni chewch chi rybuddion os yw eich dyfais:
- wedi ei diffodd neu ar fodd awyren
- wedi ei chysylltu â rhwydwaith 2G neu 3G
- ar wifi yn unig
- yn anghydweddol
Ffonau symudol a dyfeisiau eraill cydweddol
Gwnewch yn siŵr fod gan eich dyfais yr holl ddiweddariadau meddalwedd diweddaraf.
Mae rhybuddion argyfwng yn gweithio ar y canlynol:
- Ffonau iPhone sy'n rhedeg iOS 14.5 neu systemau diweddarach
- Ffonau a llechi Android sy'n rhedeg Android 11 neu systemau diweddarach
Os oes gennych chi fersiwn Android cynharach, efallai y bydd modd o hyd i chi gael rhybuddion. I wirio, chwiliwch osodiadau'ch dyfais am ‘osodiadau argyfwng’.
Os hoffech weld rhybudd eto
I weld rhybudd eto, ewch i rybuddion presennol neu rybuddion y gorffennol.
Gallwch chi hefyd chwilio am rybuddion argyfwng ar eich ffôn symudol neu'ch llechen.
Os cewch chi negeseuon atgoffa am rybudd
Efallai y caiff ffonau symudol a llechi Android fwy nag un neges atgoffa am yr un rhybudd argyfwng. Gallwch ddiffodd y negeseuon rhybudd hyn trwy'r gosodiadau ‘rhybuddion argyfwng’ ar eich dyfais.
Optio allan o rybuddion argyfwng
Gallwch optio allan o rybuddion argyfwng, ond dylech eu cadw ymlaen er eich diogelwch eich hun.
I optio allan:
- Chwiliwch am ‘rybuddion argyfwng’ yn eich gosodiadau.
- Diffoddwch ‘rybuddion difrifol’ a ‘rhybuddion eithafol’.
Os byddwch chi'n dal i dderbyn rhybuddion, cysylltwch â gwneuthurwr eich dyfais i gael cymorth.
Eich data personol
Does dim angen bod gan y gwasanaethau brys na llywodraeth y DU eich rhif ffôn er mwyn anfon rhybudd atoch chi.