Gweithio i DWP

Gwybodaeth am wneud cais ar gyfer swyddi gyda a gweithio i’r Adran Gwaith a Phensiynau (DWP).

Gweithio i DWP

Mae DWP yn gweithredu ar raddfa sydd bron heb ei ail unrhyw le arall yn Ewrop ac mae’r rhan fwyaf o bobl ym Mhrydain yn cael cysylltiad â ni ar ryw bwynt yn eu bywydau. Rydym yn cynnig:

  • ystod eang o yrfaoedd diddorol a gwobredig
  • cyfle i wneud gwahaniaeth go iawn i fywydau pobl
  • pecyn buddion ardderchog i weithwyr

Rydym yn arwain ar bolisïau’r llywodraeth ar gyfer lles, pensiynau a chynhaliaeth plant. Rydym yn helpu pobl i ddod o hyd i swyddi a chyflogwyr i lenwi swyddi gwag. Rydym yn gwneud taliadau i geiswyr gwaith, pensiynwyr, pobl anabl, rhieni a gofalwyr. Mae ein staff yn gwneud y newidiadau mwyaf i’r system les mewn cenhedlaeth, gan gynnwys cyflwyno Credyd Cynhwysol a’r Pensiwn newydd y Wladwriaeth.

Darllenwch fwy am weithio i’r Adran Gwaith a Phensiynau.

Swyddi

Rydym yn hysbysebu pob swydd ar wefan Civil Service jobs. Gallwch ddarganfod mwy am weithio i DWP ar y gwefannau canlynol:

Cydraddoldeb ac amrywioldeb

Mae DWP yn darparu gwasanaethau sy’n croesawu amrywioldeb ac sy’n hybu cydraddoldeb cyfleoedd

Fel Arweinwyr Hyderus o ran Anabledd, byddwn yn cynnig cyfweliad i bobl anabl os ydyn nhw’n bodloni’r meini prawf gofynnol ar gyfer y rôl.

Ni fyddwn yn goddef gwahaniaethu ar sail rhyw, statws priodasol, cyfeiriadedd rhywiol, hil, lliw, cenedligrwydd, crefydd, oedran, anabledd, statws HIV, patrwm gwaith, cyfrifoldebau gofalu, gweithgaredd undeb llafur, credoau gwleidyddol neu ar sail unrhyw beth arall.

Yr hyn y gall DWP ei gynnig i chi

Cyflog

Rydym yn darparu:

  • cyflog cystadleuol sy’n cael ei adolygu’n flynyddol
  • cynllun gwobrwyo cynhwysfawr sy’n cynnwys talebau blwyddyn a dyfarniadau ariannol
  • pensiwn galwedigaethol

Buddion i weithwyr

  • datblygu gyrfa a’r cyfle i ddysgu sgiliau newydd ac ennill cymwysterau perthnasol
  • hyd at 30 diwrnod o wyliau blynyddol a 9 diwrnod o wyliau cyhoeddus a braint mewn blwyddyn (pro rata ar gyfer staff rhan amser)
  • absenoldeb mamolaeth, mabwysiadu neu riant a rennir o hyd at 26 wythnos o dâl llawn ac yna 13 wythnos o dâl statudol a 13 wythnos arall yn ddi-dâl, ac absenoldeb tadolaeth o hyd at 2 wythnos o dâl llawn yn amodol ar gymhwysedd
  • amser i ffwrdd i ddelio ag argyfyngau, sefyllfaoedd annisgwyl a rhai amgylchiadau arbennig eraill heb eu cynllunio
  • o leiaf 3 diwrnod o wyliau arbennig bob blwyddyn i ymgymryd â chyfleoedd gwirfoddoli
  • amser i ffwrdd â thâl ar gyfer dyletswyddau gwasanaeth cyhoeddus, er enghraifft os ydych yn filwr wrth gefn o’r lluoedd arfog
  • polisïau sy’n gyfeillgar i deuluoedd gan gynnwys patrymau gweithio hyblyg
  • cefnogaeth ar gyfer lles meddyliol a chorfforol
  • Rhaglen Gymorth i Weithwyr - gwasanaeth cyfrinachol am ddim sy’n darparu gwybodaeth a chwnsela i helpu gydag ystod o faterion gwaith, teulu a phersonol
  • yr opsiwn i ymuno ag undeb llafur

Beth rydym yn ei ddisgwyl gennych

Credwn fod DWP yn cynnig cyfleoedd rhagorol a gwobrau hael. Yn gyfnewid am hyn, mae gennych gyfrifoldeb i:

  • cyfrannu at agenda’r adran, cymryd cyfrifoldeb personol am y cyfraniad hwnnw a dangos ymrwymiad ac ymdrech yn y gwaith rydych yn ei wneud
  • ymrwymo i wella eich perfformiad trwy gydol eich cyflogaeth yn DWP
  • sicrhau eich bod yn deall, yn derbyn ac yn cydymffurfio â pholisïau a gweithdrefnau’r Adran
  • cydymffurfio â chod y Gwasanaeth Sifil
  • bod yn hyblyg ac yn addasadwy - er enghraifft, trwy newid eich patrwm gweithio os oes angen busnes
  • trin cydweithwyr a chwsmeriaid â pharch ac fel y byddech am gael eich trin eich hun
  • mynychu’r gwaith ar amser ac aros mewn cysylltiad os nad ydych yn gallu gweithio
  • cael y wybodaeth ddiweddaraf am ddatblygiadau, newidiadau a gwybodaeth
  • ymrwymo i wella gwasanaeth cwsmeriaid
  • parchu natur gyfrinachol y wybodaeth a gewch fel rhan o’ch swydd

Sut rydym yn recriwtio

Mae’n broses ddethol yn seiliedig ar broffiliau llwyddiant. Mae hwn yn fframwaith hyblyg sy’n caniatáu i ni gyfateb y bobl iawn ar gyfer y swyddi cywir trwy eu hasesu yn erbyn uchafswm o 5 elfen wahanol drwy ddefnyddio amrywiaeth o ddulliau dethol.

Bydd yr elfennau sy’n berthnasol i bob rôl yn amrywio yn dibynnu ar y proffesiwn, lefel a math o rôl. Er enghraifft, gall hysbyseb ar gyfer rôl lefel mynediad yn y Proffesiwn Cyflenwi Gweithredol gynnwys gwahanol elfennau i rôl reoli mewn Cyllid.

Gallai’r dull asesu gynnwys ffurflen gais, CV a/neu ddatganiad ategol, profion ar-lein, cyfweliad, cyflwyniad neu Ganolfan Asesiad.

Darllenwch ragor o wybodaeth am Broffiliau Llwyddiant.

Cwynion

Mae ein proses recriwtio yn dilyn yr egwyddor o ddetholiad wedi’i seilio ar deilyngdod yn seiliedig ar gystadleuaeth agored fel yr amlinellir yn Egwyddorion Recriwtio Comisiwn y Gwasanaeth Sifil.

Os credwch nad yw eich cais wedi’i drin yn unol â’r egwyddorion hyn ac am gwyno, yn gyntaf dylech gysylltu â’r person sy’n gyfrifol am yr ymarfer recriwtio o fewn DWP.

Os nad ydych yn fodlon gyda’r ymateb a gewch gan DWP, gallwch gysylltu â’r Comisiwn y Gwasanaeth Sifil.

Cynnwys